Nunarput Korea kujallerlu suleqatigiinnerulissapput

Naalakkersuisut siulittaasuata, Kuupik V. Kleistip, Koreap kujalliup Nunattalu suleqatigiinnerunissannut periarfissat pillugit Koreap kujalliup nunanut allanut ministeria, Kim Sung-hwan, ullumikkut ataatsimeqaatigaa.

Kuupik V. Kleistip ataatsimeeqateqarnerani Ove Karl Berthelsen aamma Palle Christiansen peqataapput, taakkulu Koreamut kujallermut pisortatigoortumik tikeraarnermi pingasunngornermi aallarnerneqartumut peqataapput.

Suleqatigiinnerup nukittorsaavigineqarnera, aammalu ilinniartitaaneq, ilisimatusarnikkut suleqatigiinneq kiisalu aatsitassatigut pinngortitamillu pisuussutit suleqatigiissutiginissaat ulluni kingullerni atsioqatigiissutigineqarneri illuatungeriit nuannaarutigalugit oqaatigaat.

Suleqatigiinnerup tigussaasunngortinneqarnissaa siunertaralugu atorfilittatigoortumik oqaloqatigiinnerit ingerlateqqinnissaat aamma illuatungeriit isumaqatigiissutigaat.

Koreap kujalliup nunanut allanut ministeriata Kim Sung-hwanip Naalakkersuisullu siulittaasuata, aamma silap pissusiisa allanngoriartorneri avatangiisillu kiisalu Kalaallit Nunaata Koreallu kujalliup akornanni niuernermik aningaasaliinernillu siuarsaanissaq eqqartorpaat, Naalakkersuisut siulittaasuata  Naalakkersuisoqarfianit ullaaq manna oqaluttuarineqarpoq.

Suliffeqarfiit Nunatsinneersut arlariit, ilaatigut Royal Greenland, Great Greenland, Visit Greenland, Nuna Minerals kiisalu Nuna Oil kalaallit pisortatigoortumik aallartitaannut peqataapput.

Naalakkersuisut aallartitaat pingasuusut, Præsident Lee Myung-bak tikeraarnerup ulluani siullermi naapippaat.

Aammattaaq præsidentip Nunatsinnut ukiormanna tikeraarnera pillugu assilisanik saqqummersitsinerup alakkarternissaa piffissaqarfigineqarpoq, niuertarfissuarmilu Shinsegaemi Kuupik V. Kleist Juullip Inua peqatigalugu meeqqanut tunissutissanik agguaavoq, takornariartitsinermi nittartagaq Greenland Today oqaluttuarpoq.

Kalaallit Nunaanni aatsitassat pillugit suliffeqarfinnik annertuumik isumasioqatigiisitsisoqassaaq, Koreap kujallermiullu kalaallit nerisassaataannik, Ilulissani Hotel Arcticimi igasorsuarmit Jeppe Ejvind Nielsenimit nerisassiarneqartunik ussiisinneqassallutik.

Kulturimut tunngatillugu aamma Nive Nielsen and the Deer Children arlalinnik tusarnaartitsissapput, filmilu ”Inuk” tikeraarnermi aamma takutinneqassalluni, taamaammat aamma filmimi ilitsersuisuusoq isiginnaartitsisorlu Ole Jørgen Hammeken peqataavoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl