Nunarput aatsitassarsiorusulernissamik neriuppoq
Kalaallit Nunaat "Greenland Day"i-mik taallugu Torontomi ataatsimeersuarnermi ukiumoortumik nittarsaassisarpoq, Namminersorlutik Oqartussat, suliffeqarfiillu assigiinngitsut, Kalaallit Nunaanni aatsitassarsiornermi periarfissat nittarsaassisarlutik, aningaasaliisussarsiorlutillu suleqatissarsiortarlutik.
"Greenland Day"-imik aaqqissuussisut tassaapput Namminersorlutik Oqartussat sulisitsisullu peqatigiiffiat GE, Danmarkip Torontomi konsulatia aamma suleqatigineqarluni.
Kalaallit Nunaanni ujarassiuutut misissuinermi periarfissat ullaap tungaani saqqummiunneqassapput, soorlu aamma aatsitassarsiornermi suliniutit maanna ingerlanneqartut saqqummiunneqassasut. Nunatsinni aatsitassarsiorsinnaanissamut akuersissutit malittarisassallu suunersut ualeru taava saqqummiunneqassapput, soorlu aamma saffiugassat qaqutigoortut pillugit immikkut ittumik saqqummiussisoqarumaartoq.
AAMMA ATUARUK Nunatta aatsitassarsiorneq akuuffigerusukkaa
"Greenland Day"-imik taallugu Kalaallit Nunaannik Torontomi ataatsimeersuarnermi nittarsaassinersuaq ornigarneqarluartartoq, Danmarkip Torontomi generalkonsuliata Niels Tanderup Kristensenip oqaatigaa, tassalu inuit 150-it missaat ornigullutik.
Naallu aatsitassarsiornissamut aningaasaliisussarsiornermi Torontomi ataatsimeersuartoqarnerani unammilleqatigiittoqaraluaqisoq, Kalaallit Nunaat ukioq manna soqutigilluarneqartoq, Niels Tanderup Kristensenip nalilerpaa.
Nunavummit aningaasaleerusuttut arfinillit, aningaasaliinissamullu aningaasaateqarfik Canadameersoq "Greenland Day"-eqareernerup kingorna ataatsimeeqatigineqarnissaat pilersaarutigineqartoq, taassuma innersuussutigaa:
- Soqutiginninneq annertoqaaq, suliffeqarfiillu Issittumi suliniutinut ataatsimut isigalugu, Kalaallit Nunaannilumi, aningaasaleerusuttut immikkut ataatsimeeqatigineqarnissaannut siullerpaamik pilersaarusiorpugut, Danmarkip Torontomi generalkonsulia Niels Tanderup Kristensen, suleqatitsinnut Inge S. Rasmussenimut taama oqarpoq.
