Nunatta aatsitassarsiorneq akuuffigerusukkaa
Aatsitassarsiornermi ukiumoortumik nittarsaassinersuaq PDAC (Prospectors & Developers Association of Canada) Metro Toronto Convention Centerimi sapaatiuppat ammarneqarpat Namminersorlutik Oqartussat, Inatsisartut, suliffeqarfiit namminersortut kommunillu PDAC-mi peqataatitaqassapput.
Kalaallit Nunaannit PDAC-mut peqataasut aatsaat taama amerlatigissapput. Inuit 20.000-it missaat, nunanit 125-neersut PDAC-mi peqataakkajupput, peqataanissarlu peqataannginnermut naleqqiullugu pingaarnerusoq, PDAC-mik aaqqissuisut nittartakkaminni namminneq oqaatigaat:
- Aatsitassarsiornerup silarsuaani ataatsimiinneq una pingaarnerpaavoq, pinngitsoornallu peqataasariaqarputit, Lisa McDonald, PDAC-meersoq oqarpoq.
Inuit 80-ingajaat nunatsinniit ukioq manna peqataassapput. Kalaallit Nunaat aatsitassarsioqatigiinnut nittarsaanneqassaaq, Kalaallit Nunaallu aatsitassarsiornermi pingaaruteqarnerulissagaluarpat attaveqarfissat pissarsiarineqartariaqarput.
AAMMA ATUARUK Suli pitsanngorsisariaqarpugut
Aatsitassanut naalakkersuisoq Múte B. Egede Namminersorlutik Oqartussat sinnerlugit peqataassaaq, atorfilittallu ilaat aamma angalaqataassallutik.
Inatsisartut Inuussutissarsiornermut Aatsitassanullu Ataatsimiititaliaanni ilaasortat akornanni arfinillit, allatsi nutserisorlu peqataassapput.
Qeqqata Kommunia peqataavoq
PDAC-mi peqataarngaartunut ilaavoq Qeqqata Kommuniani Arctic Circle Businessimi pisortaq Juliane Henningsen. Aatsitassarsiornermi suliniutit marluk Qeqqata Kommuniani piviusunngortinneqarsinnaanissaat suliniutaavoq, tassa Hudson Resourcesip North American Nickelillu suliniutaat.
AAMMA ATUARUK Suli pitsanngorsisariaqarpugut
Qeqqata Kommuniani suliffeqarfiit inuussutissarsiornikkut periarfissaasa piorsarneqarnissaat Arctic Circle Businessimit suliarineqarpoq, Kalaallit Nunaanni suliffeqarfitsigut nukittorsaanissaq suliarineqarluni, soorlu suliffeqarfiit nunatsinneersut aatsitassarsiornermi peqataatinneqarnissaat ilaatigut anguniagaalluni:
- Sakkussanik suleqatissatsinnillu pissarsiumaartunga naatsorsuutigaara, Qeqqatalu Kommuniata aatsitassarsiortunut iserfigiuminartuunissaa, suleqatissanillu nassaarsiorfigineqarsinnaanera nittaarsaatissavarput, Arctic Circle Businessimi pisortaq Juliane Henningsen taama oqarpoq.
