Muté: Suli pitsanngorsisariaqarpugut
Canadamiut isummersuisarfiata Fraser Institutep nunat aatsitassarsiorfigissallugit ujaasiffigissallugillu pilerinarnerpaat ukiumoortumik misissuiffigimmatigit Kalaallit Nunaat ukioq manna inissanik 21-nik qaffariarpoq.
Kalaallit Nunaata aatsitassarsiorfissatut avatitsinniit pilerigineqaleraluttuinnarnera aatsitassanut naalakkerusuisup Múte B. Egedep, Inuit Ataqatigiinneersup nuannaarutigaa.
Akueraali aamma Kalaallit Nunaata unammillertunngorsinnaalernissaanut aqqut suli takimmat.
- Suli suliassaqaqaaq. Paasiniaanermi inissanik 21-inik qaffariarsimanerpput asuli ilorrisimaarutaassanngilaq.
Múte B. Egede taama oqarpoq. Siorna Kalaallit Nunaat pilerigineqartut akornanni periarfissanit 104-raasunit normu 55-ugaluarpoq, ukioq mannali nunanit 91-init normu 34-ngorpoq.
AAMMA ATUARUK Hudson-mine forventes klar til sommer
Aatsitassanut naalakkersuisoq isumaqarpoq, Namminersorlutik Oqartussat qinnuteqaatinik suliarinnittarnerat sukkatsissimasoq, soorlu ujarlernissanut aatsitassarsiornernullu annikittunut qinnuteqaatit suliarinerini.
Kalaallit Nunaalli unammillernerusinnaajumalluni atuinissamut qinnuteqaatinik agguaassinerusariaqarpoq.
- Suli pitsanngorsisariaqarpugut, ilaatigut qinnuteqaatinut sullissisarnerni allaffissornerup eqaannerusumik sukkanerusumillu ingerlanneqartarnissaa anguniarlugu.
Múte B. Egede taama oqarpoq, innersuussutigalugu aatsitassanik atuinissamut maani suli amerlanernik tunniussisoqarsinnaagaluarmat.
AAMMA ATUARUK Aatsitassarsioqatigiit innuttaasunik ataatsimiisitsiniartut
Fraserip misissuisarfiata nalilersorsimavaattaaq politikkikkut periarfissat.
Tamatumuunali Nunarput pitsanngoriaateqarpallaanngilaq, siorna normu 63-oriarluni ukioq manna normu 54-iuvoq. Múte B. Egedeli naalaarnissaminut piareersimanerarpoq:
- Sullissinermi isornartorsiorneqartarsimasut pillugit suliat aallartisarsimavagut; inuussutissarsiortullu isornartorsiutaat aaqqiiviginiarlugit pitsarnngorsaasimalluta.
Aatsitassanut naalakkersuisoq Múte B. Egede taama oqarpoq. Taanna angalaqatissanilu sisamanngornermi Torontoliarlutik aallassapput, ukiumoortumik nittarsaassinissarsuarmut peqataajartorlutik.
Kalaallit Nunaata 2013-imi angusimavaa nunat 112-it akornanni normu 7-inngorluni, Kalaallit Nunaat politikkikkut 2013-imi nunat 112-it akornanni normu 19-nngorpoq.
