Hudsonip piiaaffissaa aasaru piariissaaq

Anorthosit tonserpassuit piiarneqarnissaat pilersaarutaavoq sulisussallu amerlanerpaartaat nunaqavissuunissaat naatsorsuutigineqarpoq.

- Soorlu illussat taavalu tunisassiorfissat, aserorterivissat, anorthositinut piiaanermi umiarsualivissaq, tamakku naammassilluinnagajalerput, Qeqqata Kommuniani aatsitassat pillugit ataqatigiissaarisoq Peter Søren Olsen oqarpoq.

Upernaaru piareersaatit kingulliit naammassippata julimi aatsitassarsiorneq aallartissasoq Hudson Greenlandip naatsorsuutigaa.

- Kingulliillu sanaartugassat naammassereeriarunikkit naatsorsuutigivaat juulimi augustusimiluunniit aatsitassarsiorfik ammarneqarsinnaasoq nalunaarput.

AAMMA ATUARUK Hudsonimut isumaqatigiissut: Taarnermi qaamaneq

Kinguaattoorput

Piianeq siorna aallartittussaagaluartoq kinguaattoorpoq, tassani illup toqqavissaata suliarineqarnissaa sulisussaarunneqarpoq. Suliffeqarfik sanasussaarukkami piareerumallutik Canadamit tikisitsisariaqarsimavoq.

Piiagassaq anorthositi, aluminamik, siliciumimik kiisalu calsiumimik sananeqaateqarpoq, glasfiberiliornermullu ilaatigut atorneqartarluni.

Naajaanilu piiagassaq annertoorujussuuvoq nunarsuarmilu minguinnerpaatut oqaatigineqarluni. Tonserpassuillu qallorneqassapput.

- Tassanilu ukioq siulleq tunisassiassatut 200.000 tonsit missaaniippoq. Kisianni annertusiartuaartinneqassasoq nalunaarutigineqarnikuulluni.

AAMMA ATUARUK Qaqortorsuarmi piareersaataasumik sanaartorneq ingerlalluartoq

Nunaqavissut sulisorineqassapput

Piiaaneq aallartinneranit ukiuni 20-ini ingerlassasoq naatsorsuutigineqarpoq. Sulisorineqartussanilu 60-iusuni 80-ii nunaqavissuussallutik.

- Neriuutigilluinnarparput Qeqqata Kommuniani amerlanerpaartaat aallartippassuk sulisussat kalaaliussasut, Peter Søren Olsen oqarpoq.

Nunarsuarmi glasfiberinik tunisassiorfiit annersaat Amerikamiittoq, Hudsonip ukiuni tulliuttuni qulini tunitsivigisinnaallugu isumaqatigiissuteqarfigereerpaa.

AAMMA ATUARUK Aningaasaliineq nunanut allanut takutitsilluarneruvoq