Nunaqarfinni inuusuttut ilinnialernissamut piumassuseqarnissaat ujartorneqarpoq
Nunaqarfinni ilinniartitsinermik kivitsinissaq siunertaralugu suliniut, NUIKI, inuusuttunut 16-iniit 30-it tungaanut ukiullinnut suliniuteqarmat, peqataasuni 80 procentit angullugit iluatsillutik ilinniarnermik aallartitsisimanngikkunik aalajangersimasumik suliffittaarsimapput. Iluatsitsinermullu toqqammaviunerpaasimapput ulluinnarni pisariaqartitani nalinginnaalluinnartut:
- Angajoqqaanit tapersersorneqarneq, tassa imaappoq assersuutigalugu unnukkut piffissaq eqqorlugu innartarneq, piffissaq eqqorlugu atuariartortarsinnaaneq kaammattorneqartarnissarlu pingaarutilerujussuuvoq ilinniaqqinnissamut. Angusarissaarnissamut tunngavissat pingaarnerpaat ilagaat taanna, Palle Lennert Nuikimi suliniummi suleqataasoq oqarpoq.
Meeqqat inuusuttullu aalajangersimalluinnartunik sinaakkuteqarlutik ilinniagaqalernissaannut tapersersorneqartariaqarnerat Upernaviup eqqaani nunaqarfiit ilaanni timelærerimit ilisarilluarneqarpoq:
- Uanga isumaqarpunga meeqqat angerlarsimaffimmi perorsaanermi killilersorneqartariaqartut. Taavalu aamma akisussaaffilersorlugit. Soorlu assersuutigalugu erruinermut ikiuuttariaqarput angerlarsimaffimmi, suliassanut aamma allanut ikiuuttariaqarput. Taavalu aamma unnukkut pigaarpallaaratik innartariaqarput, Naajaarmiu, Regine Olsvig, oqarpoq. Taanna Nunaqarfimmi aqutsisuni ilaasortaanini tunuliaqutaralugu ataatsimeersuarnermi peqataavoq. Regine Olsvigilu ima nangippoq:
- Tassami Upernavimmut kollegiamut aallaraangamik malunnartarpoq amerlanertigut unnukkut killilimmik unitsitaasarneq taavalu aamma errugassanut allanullu pisussaaffilersorneqarneq pillugu ilaatigut tamakkua nuannarinagit nunaqarfimminnut angerlaannartarmata, Regine Olsvig oqarpoq.
Nuikimi suliniutip nunaqarfinni ilinniartitsineq kivinniartussaavaa, ukiumullu inuusuttut 45-it 16-iniit 30-it tungaanut ukiullit suliniuteqarfigineqarfigisarlugit. Inuusuttorpassuillumi angerlarsimaffimminni aalajangersimasunik sinaakkuteqarunik tapersersorneqarlutillu ilinniagaqarsinnaangaluarput:
- Inuusuttut atuartitagut tunngavilersorlugit aallaavilersortarnikuuagut, assersuutigalugu piffissamik eqquisinnaanissamut. Taavalu aamma ukua periarfissinneqarnermikkut takutitsisinnaassuseqarput piumassuseqarunik. Taavalu aamma ilinniagaqalernissamut kaammattorneqarlutik, Palle Lennert oqarpoq.
Suliniut Nuiki Villumfonden aamma Namminersorlutik Oqartussat suleqatigiillutik ingerlataraat. Suliniut 2017-ip tungaanut ingerlanneqassaaq inuusuttut 180-it suliniummut akulerutsinneqassallutik.
