VIDEO Nunaqarfimmiut katersortarfimmi nunanut allanut unammisartussanik ineriartortitsisut
Nivissat taakku pingasut Niaqornaarsummiuupput, tassanilu nerrivimmi arsaarartartut peqatigiiffiat NBK-88 ukiut 27-t matuma siorna Thomas Petersenimit pilersinneqarpoq. Timersuutigisartik ima aallutsigaat, allaat juullimi atuanngiffeqarnertik sungiusarnermut atorlugu.
- Nukannguakkut isiginnaartarnikuuakka, taava nuannerunartillugu nammineq aallartippunga, Inngili Petersen KNR-imut oqarpoq.
Taakku nunanut allanut unammisartutut 2010-miilli nunatsinni nunanilu allani angalasarsimapput.
- Ilaatigut Savalimmiunut, Islandimut, Alaskamut Canadamullu angalanikuuvunga.
- Piumassuseq pigiuartillugu sunaluunniit anguneqarsinnaavoq, aamma timersortarfissuaqanngikkaluaraanni nunaqarfimmiuullunilu, Nukannguaq Søholm oqaluttuarpoq.
Aamma atuaruk Kalaallit nerrivimmi arsaarartartut Danmarkimi ingerlallualaavissortut
Katersortarfimmi unammisarput
Nerrivimmi arsaartartut ilaat Danmarkimi ukioq ataaseq efterskolersimapput, tamannalu suli pikkorinnerulissutigisimallugu.
- Sukasaatigisorujussuusimassavara. Maani ilungersualaneq-ajorpunga, taakani ilungersuasarpunga.
- Massakkut ilungersualanerulernikuuvunga, kisianni taakaniinngikkallarama ilungersualaneq-ajorama, Melissa Larsen oqarpoq.
Pilersitsisup ingerlalluartoqarnera nuannaarutigaa
Katersortarfimmullu alakkarteraanni nukappissat nivissallu nerrivimmi arsaarartut imaaginnavittarput. Tamannalu timersoqatigiiffiup siulittaasuata pilersitsisuatalu nuannaarutigaa.
- Inuit issittormiut unammisaqattaarnerannut peqataasoqartarsinnaanera sinnattorinikuunngisaannarparput. Taamaammat nunanut allanut unammisartut maanngaanneersunik peqataasoqartalermata tupaallaatigeqaarput. Tamannalu assorsuaq nuannaarutissaavoq.
- Nunaqarfimmi periarfissamininnguit atorluarneqarnerisigut pitsaasumik inissittoqarsinnaanera uppernarsaaserpara, Thomas Petersen oqarpoq.
Nunaqarfik Niaqornaarsuk Aasiaat kujataatungaaniippoq. Nunaqarfimmiullu 80-it missaasa timersoqatigiiffik aningaasanik, nerisassanik kaagilianillu tapersersugaraat. Nerrivimmi arsaarartartut 30-t missaanniipput pikkorissullu amerliartuinnassasut NBK-88-ip siulittaasuata neriorsuutigaa.