Nunaqarfik ikiaroornartoqarfittut tusaamaneqartoq pinnersaasiassanik piaaffittut siuariartulersoq

Ineriartornissamut periarfissaalluartut, Naalakkersuisunut ilaasortat pingasut nunaqarfimmi tikeraanerminni takusarpaat.

Ikiaroornartut aningaasamoornerillu nunaqarfeeqqami ajornartorsiuteqartorujussuunikuupput
Qeqertarsuatsiaani ukiut 25-it sinnerlugit kommunefogedi, Ado Johnsen paasissutissiivoq, ikiaroornartumik atuineq, ikiaroornartumik tuniniaaneq aningaasanoornerujussuarlu, nunaqarfeeqqami annertuumik ajornartorsiutigineqartoq. Naak piiaavik suliffissanik pilersitsillattaaraluartoq, nunaqarfimmi innuttaasuni, 200-t missaaniittuni affai ikiaroornartumik atornerluisuunngikkunik, ikiaroornartumik tuniniaasuunngikkunillu aningaasanoorajuttuusartut.

Piiaavissamik pilersitsisoqarneratigut suliffissatigut neriulersitsisoq, Qeqertarsuatsiaani kommunip allaffiani aqutsisoq oqarpoq.

- Isumalluarfigineqarpasilernikuuvoq, pinnersaasiassanik piianissaq aallartinniarneqarmata isumaat allaanerusutut maluginiarnikuuvara taama massakkut neriuuteqarpasillutik ingerlarpasipput nunaqarfimmut iluaqutissatut, Toni Broberg Lynge taama oqaluttuarpoq.

Aamma atuaruk Qeqertarsuatsiaani rubininik suliniutissaq pillugu ullumi innuttaasunik ataatsimiititsisoqassaaq

Naalakkersuisut siulittaasuat Kim Kielsen naalakkersuisunilu ilaasortat Karl-Kristian Kruse aamma Vittus Qujaukitsoq peqatigalugit Qeqertarsuatsiaanut tikeraaqqammerput, tassaniinnerminnilu piiaanissaq ilaatigut pingaarnertut oqaloqatigiissutigineqarluni.

Naalakkersuisullu nunaqarfimmiunut periarfissanik ammaassinissaat pissusissamisoortoq, Vittus Qujaukitsoq isumaqarpoq.

 - Suliffeqarfinnut ataasiakkaanut suliffeqarferujussuarnullu avataaneersunut kisimi pisuussutinut uumaatsunik atuinerput tunngatinneqartussaanngilaq, Vittus Qujaukitsoq oqarpoq nangillunilu:

- Isumaqarpunga naalakkersuisut pissusissamisoortumik aalajangiussaqarsimasut annikitsukkuutaanik aatsitassarsiorsinnaanermik ammaassinerisigut.

Naalakkersuisullu Qeqertarsuatsiaamiinnerminni pissarsiaqarluarsimasut Kim Kielsenip oqaatigaa.

Innuttaasunullu ataatsimiisitsinerminni, piiaanissamut tunngatillugu Qeqertarsuatsiaarmiunit ilalersorneqarluartoq Naalakkersuisut siulittaasuat oqarpoq.

Aalisarnermut Naalakkersuisoq Karl-Kristian Kruse Qeqertarsuatsiaani aalisarnerup siuariartornera pillugu tusarliussassaqarpoq:

- Royal Greenlandip nalunaarutigaa, inoqarfiit saarullinniarfiusut annertusarneqassasut, tassungalu ilanngullugu Qeqertarsuatsiaat ilanngunneqarpoq, aalisakkat annertuumik pisarineqartartut Qeqertarsuatsiaani takussutissaqarmat pissusissamisoorpoq annertusaasoqassammat, Karl-Kristian Kruse taama oqaluttuarpoq.

Aligoq aappaluttumik piiaanissaq naalakkersuisunut isumallualersitsigaluartoq, nunaqarfeerannguami innuttaasut ajornartorsiungaatsiarput.