Qeqertarsuatsiaani rubininik suliniutissaq pillugu ullumi innuttaasunik ataatsimiititsisoqassaaq
Kommuneqarfik Sermersooq aamma Inuussutissarsiornermut, Aatsitassaqarnermut Suliffeqarnermullu Naalakkersuisoqarfik True North Gemsip rubininik suliniutaanut atatillugu IBA-mik isumaqatigiinniartoqarnissaanut Qeqertarsuatsiaarmiut siunnersuutissaat tusarumallugit Qeqertarsuatsiaani katersortarfimmi ullumi tallimanngornermi nalunaaqutaq marlup qeqqanut innuttaasunik ataatsimiititsiniarput.
IBA-mik isumaqatigiissut, Impact Benefit Agreement, tassaavoq pingasuulluni isumaqatigiissut, tamannalu Kommuneqarfik Sermersuumit, True North Gemsimit aamma Namminersorlutik Oqartussanit tigussaasunik suliniutinik imaqartinneqarluni isumaqatigiissutigineqassaaq, Kalaallit Nunaanni inuiaqatigiinnut minnerunngitsumillu nunaqarfimmut Qeqertarsuatsiaanut iluaqutaassalluni.
Rubininik suliniut Qeqertarsuatsiaani ineriartortitsinermut iluaqutaaqqullugu Qeqertarsuatsiaarmiut suliniutinik tigussaasunik siunnersuuteqarnissaminnut ataatsimiinnermi aamma periarfissinneqassapput.
Kommuneqarfik Sermersuup Borgmesteria Asii Chemnitz Narup aamma Borgmesterip tulliata aappaa Martha Abelsen ataatsimiinnermi peqataassapput.
- Qeqertarsuatsiaarmiut rubininik suliniummut peqataatinneqarnissaat assut pingaartippara, Inuussutissarsiornermut Aatsitassanullu Naalakkersuisoq, Jens-Erik Kirkegaard, tusagassiorfinnut nalunaaruteqarluni taama allappoq.
