Qulaarpaa Nunaqarfiit siulittaasuat iliuuseqaqqusivoq

Nunaqarfiit siorna ataatsimeersuartinneqarmata nunaqarfiit milligaluttuinnartunut neriuuteqalersimagaluarpoq. Ukiulli aappaa avillugu qaangiummat suli susoqanngilaq. Jens Kristian Therkelsenilu naammaginnikkunnaarpoq.

Jens Kristian Therkelsen, KANUNUPE-mi siulittaasoq, isumaqarpoq siorna nunaqarfiit ataatsimeersuarnerani oqariartuutigineqartut puiguinnarneqassanngitsut.

- Ataatsimeersuarnerup kingorna malinnaatitamik pilersitsisoqarpoq, taassumap ataatsimeersuarnermi oqariartuutigineqartut ingerlateqqittussaavai. Qinerseqqereernerulli kingorna susoqaqqinngilaq. Qanoruna ingerlariaqqittoqarniartoq? Jens Kristian Therkelsen KNR-imut oqarpoq.

Taanna isumaqarpoq maanna qanoq iliuuseqartoqartariaqartoq, kingusinaarnissaq utaqqiinnarnagu, taamatullu ataatsimeersuarsimaneq kinguneqartinneqartariaqartoq.

 

Kissaatit puiguinnakkat

Ataatsimeersuarnermi nunatsinni nunaqarfiit tamarmik peqataatitaqarput. Nunaqarfiillu tamagimmik najukkami kissaatigineqartut allattorpaat.

Kissaatinulli allattuiffik maanna toqquinnarneqarsimavoq, puigorneqarpasillunilu. Malinnaatitallu kissaatigineqartut ingerlateqqittussaagaluarpai, malinnaatitaqanngippalli kissaatit takorluugaannaanissaat Jens Kristian Therkelsenip aarleqqutigaa.

Aamma atuaruk Nunaqarfiit 18-it inueruteratarsinnaapput

Aamma atuaruk Nunatsinni innuttaasut naligiimmik periarfissaqanngillat

- Kissaatit tamarmik allattoqqissaarneqarput, pappialanngorlugillu suli paarivagut. Ataatsimeersuarnermilu, taakkunannga suliaqartussanngorlugu malinnaatitaq pilersinneqarpoq. Kisiannili ulloq manna tikillugu ajoraluartumik suli aallartisaqqinneqanngilaq.

 

Iliuuseqartoqanngilaq

Malinnaatitami kommunit tamarmik KANUNUPE-lu issiatitaqassapput, nunaqarfiillu ilungersortut periarfissaat misissussallugit. Malinnaatitarli pilersinneqareeraluartoq iliuuseqartoqaqqinngimmat, KANUNUPE-mi siulittaasup Naalakkersuisut arlaleriarluni attavigisarsimavai, malinnaatitap uummarissinissaa anguniarlugu. Iluatsinngitsumilli.

- Unammilligassat nerriviup qaani sukumiisumik oqaloqatigiissutiginissaanut KANUNUPE-minngaanniit erinittappugut, taama oqarusuppunga. Nerriviup qaanut qaqitsinissamut peqataarusuppugut, aammalu nunaqarfiit ukiuni tulliuttuni periarfissaat pillugit oqaloqataarusuppugut, Jens Kristian Therkelsen naggasiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat