Kisitsineq nunaqarfinni kinguariarnermik takutitsisoq: Nunaqarfiit qulingiluat kommunefogedeqanngitsut

Nunaqarfinni kommunefogedissaaleqineq ajornartorsiutaaneroqqilerpoq. Atorfiit 15-it inuttaqanngillat, nunaqarfiillu qulingiluat kommunefogedeqanngilluinnarlutik.

Allattoq Jens Thorin

juulip 07-at 2023 14:30

Nunaqarfinni kommunefogedeqarniarneq ukiorpassuarni ajornartorsiorfiuvoq.

Kommunefogedilli ilinniarnerunissaannut amerlanerusullu kommunefogedinngoqqullugit sunniinianermut atugassanik Folketingip 2018-mi aningaasaliinera malunnartumik iluaqutaavoq.

Maannali ajorneruleqqippoq.

kommunefogediuneq naatsumik

Kommunefogedit politiinut nunaqarfinnit ikiortaapput.

Nunaqarfinni eqqissisimanissaq torersuunissarlu, eqqissiviilliornerit iliuuseqarfiginissaat pinartoqartillugulu tigusarinnillutillu suliamik politiinut tunniussinissaq suliassarivat.

Kommunefogedit aamma allaffissornermik suliaqartuupput, assersuutigalugulu pisortat suliaannik innuttaasunut nalunaarutiginnittarlutik, inissiamik attartortut anisittarlugit taavalu akiliisitsissutinik tigooraasuullutik.

Tusarfik: Kalaallit Nunaanni Politiit

Kommunefogeditut atorfinnit 72-iusunit ukioq manna majimi 57-iinnaat inuttaqartut politiit nalagaffimmi tamarmi allafffianni kisitsisit takutippaat.

Aamma atuarukPaasisitsiniaareernermi: Kommunefogedinik aatsaat taama amerlatigisunik atorfinitsitsisut

Nunaqarfiit ataasiakkaat marlunnik pingasunilluunniit kommunefogedeqartussatut alajangigaasut, maanna ataasiinnarmik kommunefogedeqarput. Nunaqarfiit qulit maajip naanerani kommunefogedeqanngillat.

Folketinngimut ilaasortap IA-meersup Aaja Chemnitzip apeqquteqaataanut inatsisinut tunngasunut ministeria akissuteqarluni naatsorsuinermik Folketingip nunatsinnut tunngasunut ataatsimiititaliaanut taama allappoq.

Nunaqarfiit maajip 31-ani 2023 kommunefogedeqanngitsut

Ammassivik
Eqalugaarsuit
Igaliku
Isortoq
Kapisillit
Niaqornat
Qassimiut
Qaarsut
Ukkusissat
Aappilattoq (i Nanortalik)

Tusarfik: Inatsisinut tunngasunut ministereqarfik/ Politiit naalagaaffik tamakkerlugu allaffiat

Allisiguk

Nunaqarfiit kommunefogedeqanngitsut quliniit qulingiluanut kingusinnnerusukkut ikilisimasut, nunatsinni politiit pisortaat Bjørn Tegner Bay Sermitsiaq. AG-mut ilisimatitsivoq.

Nunaqarfiit tallimaat kommunefogedissarsinisssaat ajornakkajuttuusoq, nangilluni oqarpoq.

Innuttaasulli isumannaatsuunisartik qularutigissanngilaat.

- Eqqaamasassaavoq, qaninnerpaami politiit pisariaqartillugu nunaqarfiliartussajuaannarput. Taamaammat kommunefogedeqanngitsumiluunniit nunaqarfimmiugaluaraanni, tassanngaanniit kalerriissutit politiit tigunngitsoorlugillu qisuariarfiginngitsuussagaat annilaanngatigineqartariaqanngilaq, Bjørn Tegner Bay Sermitsiaq.AG-mut oqarpoq.

Nunatsinni kommunefogedit 2015-mi 47-nnaapput. Juulimili 2020-imi 59-iusut, tassalu aatsaat taama amerlatigisut KNR.gl-imi allappugut.

Nutaarsiassami kukkunermik nassaarsimaguit uunga allaffigineqarsinnaavugut.