Paasisitsiniaareernermi: Kommunefogedinik aatsaat taama amerlatigisunik atorfinitsitsisut
Nunatsinni kommunefogdit massaakkorpiaq 59-ipput, "aatsaat taama amerlatigalutik'.
Tamanna allagaammi, inatsisinut tunngasunut ministerip Nick Hækkerupip (S), Folketingip Kalaallit Nunaannut tunngasunut ataatsimiititaliaanut tunniusimasaani atuarneqarsinaavoq.
Danmarkimi 2018-imut aningaasanut inatsimmi nunatsinni sulianut inatsisinut tunngasunut 10 millionit koruunit immikkoortinneqarput. Aningaasat nunatsinni eqqartuussiveqarnermut tunngasunut atugassaapput.
Kommunefogedit politiinut nunaqarfinni ikiortaapput. Sulioassanik politiinut ingerlatitseqqissinanapput, eqqissiviilliornerit iliuuseqarfigalugit peqqarniitsumillu pisoqartillugu tigusarinnillutik.
Aningaasat ilaat nunatsinni kommunefogedissarsiorluni immikkut iliuuseqarnermut atorneqarput.
Taamaaliornerlumi iluaqutaavoq. Tassami siornatigornit amerlanerusunik kommunefogedeqalernissaa iluatsippoq.
- Kommunefogedit massakkut 59-iupput, aatsaat taama amerlatigalutik. Nunaqarfiit kommunefogedeqanngitsut, arfiniliinnaapput, ministeriarfik ataatsimiititaliamut allappoq.
Kommunefogedit 74-it nunatsinni tamani 2015-imi atorfeqartinneqartut, nunatsinni politiit ilisimatitsipput.
Nunaqarfinni ataatsimiititsinerit takussaanerlu
Aningaasat immikkoortitat ilaatigut nunaqarfinnut angalanernut atorneqarput.
Politiit nunaqarfinni innuttaasunik ataatsimiititsisarput ataasiakkaanillu, suliamik soqutiginnittunik oqaloqateqartarlutik.
Aamma nunaqarfiit ilaanni kommunefogedit amerlineqarput, suliat arlaliunneqarsinnaanngorlugit, akisussaaffik taamaalilluni kisermaakkunnaarlugu.
Iliuutsillu tamarmik iluaqutaasut, politimester Bjørn Tegner Bay oqarpoq.
- Taamaaliornikkut Kalallit Nunaanni kommunefogedit aatsaat tama amerlatigilerput, taanna oqarpoq.
AAMMA ATUARUK Kommunefogedit amigaataanerat nunaqarfimmiunut toqqissisimananngitsoq
Anguniagarli suli angungilaat. Sulisussarsiorluni suliniuteqartoqaraluarmalluunniit nunaqarfiit arfinillit suli kommunefogedeqanngillat. Tassa Eqalugaarsunni, Qassimiuni, Kuummiuni, Napasumi, Qaarsuni aamma Innaarsunni.
- Kalaallit Nunaanni kommunefogeqanngitsunik arfinilinnik nunaqarfeqaratta nassuerutigisariaqarparput, tamanilu kommunefogedeqalerpat aatsaat naammagisimaarinnilissaanga, Bjørn Tegner Bay oqarpoq.
Naammassininniaaneq 2020-mi nangissaaq
Politiit illoqarfinni nunaqarfinnilu pisariaqartitsiffiunerpaasuni kommunefogedinik atuutsitsilernissartik maanna ukkatarissavaat. Inatsisinut tunngasunut ministereqarfiup Tunumi illoqarfiit nunaqarfiillu immikkut taavai.
Taakkuinnaanngillalli. Politiit Danmarkimi qullersaqarfiat suleqatigalugu kommunefodissarsiornermi atugassamik ukioq manna aamma filmiliussasut, allagaammi ersippoq.
Taava aamma maanna kommunefogedioreersut atuassapput. Ilaatigut politiitut piginnaasassanik ilinniassapput politiillu pingaarnersiortagaat paasissallugit.