Nunap inoqqaavisa arnartaat periarfeerunneqartut toqutaasimasullu misissuiffigineqalersut
Canadap inoqqaavisa arnartaasa ilaatigut indianerit, metisit Inuillu periarfeerunneqarsimasut toqutaasimanissaannillu ilimagineqartut misissuiffigineqarnissaat, Canadap nunap inoqqaavinut tunngasunut naalakkersuisuata Carolyn Bennettip tamanna suliassamisut siullerpaatut suliariniarlugu maanna nalunaarutigaa.
Suliaq tamanna naalakkersuisuusimasunut qangali suliakkiutigineqartarpoq, naalakkersuisulli siuttuisa konservativiusut misissuisoqarnissaa pisariaqartinneqanngitsoq oqaatigiuartarlugu. Allaat konservatinut ilaasortap ataatsip oqaatigaa, isumaqarluni nunap inoqqaavisa angutitaasa arnartatik toquttaraat.
AAMMA ATUARUK Canadami qineqqusaarnermi naggueqativut avaqqutaarneqartut
Nunalli inoqqaavisa suliniaqatigiiffii arlaqartut allamik isumaqarput, tassa arnat pinngitsaalineqarlutik atortittartutut ikiaroornartunillu tuniniaasartutut sulisinneqartarnermi kinguneranik ilaatigut toqutaasarsimassasut. Aamma arnat politiinit soqutigineqannginnerinik pissuteqartumik toqutaasimasinnaasut pillugit tamanna misissorneqarneq ajortoq oqarlutik.
- Nunap inoqqaavisa arnartaat indianerit, inuit metisillu allaanngilaq nulumikkut qoorortuunut ooqattaasarnermut atortunik qalipanneqarsimasut, indianerit ilaat taama oqarpoq, ilanngullugulu oqaatigaai nunap inoqqaavi qaqugukkulluunniit saassunneqarsinnaasutut allaat isigineqalersimasut.
AAMMA ATUARUK Canada pisinnaatitaaffinnik unioqqutitsisutut isornartorsiorneqarpoq
Tassalu ajornartorsiut tamanna maanna misissuiffigineqartussanngortoq nuannaajallannartutut isigineqarpoq.
Nunap inoqqaavi pillugit ministerip, Carolyn Bennettip, maanna oqaatigisinnaannginnerarpaa misissuineq qaqugorpiaq aallartissanersoq. Canadamili arnat pillugit suliniaqatigiiffiup ilaasortaasa ilaata, Michelle Audetip, radioqarfimmut CJAD-imut oqaatigaa, suliaq ukiut pingasut ingerlanerini aallartisarneqarluni suliarineqartariaqartoq.
AAMMA ATUARUK Canadami arnat toqunneqartartut tammaaneqartartullu pillugit illuatungiliuttut akiuinialerput