Nunanut allanut unammisartut sungiusarnissartik Danmarkimut nuukkaat
Arnat assammik arsarlutik nunanut allanut unammisartut sungiusaasuata unammisartussaminik toqqaaqqaarnera KNR-imi januaarip 17-iani oqaluttuaraarput. Nunanut allanut unammisartut unammiuaarnermut NORCA-mut marsip qaammataani ingerlanneqartussamut piareersaataasumik Islandimi februaarip qulingiluaanit 13-ianut sungiusaqatigiittussaagaluarput.
Pilersaarutilli maanna allanngortinneqarput, nunanullu allanut unammisartut Danmarkimi sungiusartussanngorlutik. Nunanut allanut unammisartut sungiusaasuat oqaluttuarpoq toqutaasimassangatinneqartup Birna Brjansdottirip eqqartugaanerata kingorna unammisartut timersornikkut tamakkiisumik aallussisinnaannginnissaat ernummatigisimallugu.
AAMMA ATUARUK Assammik arsarlutik nunanut allanut unammisartut toqqarneqartut
- Nivissat ilaat immaqa toqqissimanatik assammik arsarnissartik tamakkiisumik aallussinnaassanngilaat, nunanut allanut unammisartut sungiusaasuat Johannes Groth taama oqarpoq, islandimiullu arnap Reykjavikkimi periarfeerunneqarnerata sammineqarnerpaaffiata nalaani taamatut aalajangersimallutik oqaatigalugu.
- Sukkasuumik aalajangertariaqaratta, assammillu arsarnissaq tamakkiisumik aallunneqartariaqarmat Danmarkimut aallaannalerpugut, sungiusaasoq oqarpoq.
ilanngulluguli oqaatigaa arnat sillimaniarnerisa ernumanartoqartinnera pissutigalugu taama aalajangertoqanngitsoq.
- Soorunami arlaannik pisoqarnavianngilaq, pisorli immikkut illuinnartuuvoq, Johannes Groth oqarpoq. Piareersaataasumillu sungiusarnissaq unammisartut kissaateqarnerisigut nuunneqarsimanersoq oqaaseqarfigiumanngilaa.
