Assammik arsarlutik nunanut allanut unammisartut toqqarneqartut
Unammisartut 14-iusut Puerto Ricomi unammiuaarnermut NORCA-mut marsip qaammataani peqataanissartik sioqqullugu februaarip 9-anit 13-ianut piareersaataasumik Islandimiissaapput.
Unammiuaarneq NORCA arnat assammik arsarlutik nunanut unammisartuinut pingaaruteqartupilussuuvoq. Pitsaanerimmi pingasut akornannut inississagunik Amerikap nunavittaani assammik arsarluni unammiuaarnernut aasaru ingerlanneqartussanut anngutissapput.
Nunanut allanut unammisartut sungiusaasortaavat, Johannes Groth, unammisartut Islandimeeqatiginissaannut qilanaarpoq:
- Unammisartut arsaaffimmi arsaaffiullu avataani qanoq katitigaassanersut aaqqissuuttussaavarput. Taamatut katersuunnissaq Puerto Ricomi unamminissat sioqqullugit pingaaruteqarpoq. Unammivataassapput, pingaartumik talerperliit saamerliillu imminnut qanittuararsuupput. Tamanna aamma stregimi unammisartunut atuuppoq. Taamaammat unammisartoqatigiinni ataasiakkaat inissisimanerat Puerto Ricomi unammisoqalerpat allaanerusinnaavoq, tamanna Islandimeereerutta paasilluarsinnaalissavarput, nunanut allanut unammisartut sungiusaasuat Nunatsinni Assammik Arsartartut Kattuffiata tusagassiorfinnut nalunaarutaani taama oqarpoq.
Unammisartut toqqarneqartut tassaapput:
Nivi Fly
Andrea Andreassen Karlsen
Navarana Davidsen
Sara Biilman Egede
Anja Heilmann
Anja Salsø
Lykke Frank Hansen
Christina Lange
Najaaja Anja Lyberth
Kathrine Fuglsang Mikkelsen
Panu Petersen Grønvold
Nivi Berthelsen
Nivi Heilmann Efraimsen
Arnannguaq Steenholdt
