Unamminerni kingullerni ajugaaniunneq: Nunanut allanut unammisartugut VM-imi siullermeerlutik ajugaasinnaasut
Naatsorsuutigineqartutulli arnat kalaallit assamik arsartartut nunanut allamut unammisartui Stavangerimi nunarsuarmi pissartanngorniunneranni ajorsarnerit pingasuupput.
Naak arnat nalilerneqarnerat annikikkaluartoq arnat unammillersinnaassuseqarluarlutik nukissaqarluartullu takutitsigaluartut Norgemit, Korea Kujallermit Østrigimiillu unammisartut unammillugit ilungersunangaatsiarput.
Arnat kalaallit assamik arsartartut nunarsuarmi pissartanngorniunnerat suli naammassinngilaq.
Holdit 32-t nunarsuarmi pissartanngorniunnermi unammeqattaarnerni kingullerni unammissapput. Taamaammat kalaallit arnat assamik arsartartut Norgemi Stavangerimit Danmarkimi Frederikshavnimut timmisartorput, sapaatillu akunnerani aggersumi Presidents Cupimi 25-mit 32-nngorniunnermi peqataassallutik.
Nunanut allanut unammisartut unamminissaat siulleq aqagu pissaaq tassani Island unammissavaat.
Naak unamminerni kingullerni ajugaaniunnerugaluartoq aallartinnerat ajornaatsuinnaassagunanngitsoq, timersortuni oqaluttuusartoq KNR-imeersoq, Noah Mølgaard naliliivoq.
- Unamminerni aallarniutaasuni Stavangerimi pisuni Island isiginnaarparput, tassani takuarput pikkorissorujussuusut. Naak nunanut sakkortunerusunut ajorsaqattaaraluarlutik. Taamaattoq ilimagereersinnaavarput sakkortuunut Kalaallit Nunaanut tassa unammisussanngortut, taanna oqarpoq.
VM-imi ajugaanerusoqarsinnaava?
Islandimulli unamminerup kingorna unammisassat unamminarnerussapput. Arnat assamik arsartartut arfininngorpat Kina unammissavaat, marlunngornermilu Paraguayimut unammissallutik.
Kalaallillu tassani angummassinnaanerussasut, Noah Mølgaard oqarpoq.
- Nunat taakku unammisaqattaarnerini isiginnaakkagut malillugit nunat taakkua sakkukinnerumaartunut ilaapput, taamaattumik ilimanarsinnaavoq kalaallit arnat arsarnermi VM-imut peqataanerminni siullerpaamik arfininngorpat imaluunniit ataasinngorpat pointinnakkumaarput, immaqa marloriarlutilluunniit pointinnassinnaapput unamminerni taakkunani tulliuttussani.
Timersortuni oqaluttuusartup Noah Mølgaardip oqarnera naapertorlugu arnat kalaallit unamminissanut aggersunut piareersimalluarput.
- Stavangerimi unammisaqattaarnerminni målerpassuarnik ajorsaraluarlutik, taamaattoq sinnattoq aamma piviusunngortinnikuuaat. Nunarsuarmi pissartaasunut unammineq misilippaat. Taavalu aamma målerpaalussuarnik ajorsaraluarlutik unamminerit ingerlanerini ingerlalluarfeqallattaagamik. Taakku iluatsittut maanna unammisaqattaarnerni tulliuttuni nukissanik tunisisimassasut qularutissaanngilaq, taanna oqarpoq.
Nunatta Frederikshavnimi Presidents Cupeqarnerani unamminerat KNR TV-kkut toqqaannartumik aallakaatinneqassaaq.
