Nunanut allanut unammisartoq pakatsisoq: Nunarsuarmi pissartanngorniuteqataaqqinnissaq ajornakusuussaaq

Kalaallit arnat nunanut allanut assammik arsarnermi unammisartut Stavangerimi siorna nunarsuarmi pissartanngorniuteqataagamik amerlasuut uummataannut immersuipput.

Kalaallit isiginnaarutikkut angisuukkut malinnaammata nuannattoqarlunilu tulluusimaartoqarpoq.

Tassungali killeqqinnissaq ajornakusoorsinnaavoq.

Kalaallimmi assammik arsarnermi kattuffiata aningaasassaarunnini pissutigalugu nunanut allanut unammisartunut ukiup sinneranut pilersaarutit tamarmik taamaatippai. Tamanna arnat nunanut allanut unammisartut aappaagu nunarsuarmi pissartanngorniuteqataanissamut anngunniunnissaminnut atatillugu katerinnissaannik taamaatitsinermik ilaatigut kinguneqarpoq.

Tamannalu nunanut allanut unammisartup, Ivâna Meinckep uggoraa.

- Assammik arsarneq uannut pingaartorujussuuvoq. Nunarsuarmi pissartanngorniuteqataanissaq meeraallungali sukataarutigilerpara. Uangaannaanngilaq, holdilli tamarmi. Ukiut 22-t nunarsuarmi pissartanngorniuteqataasimanata peqataaqqippugut, maannali aningaasat piinnarlugit suliarujussuaq tamarmi unitsiinnarneqarpoq, tamanna tamatsinnut annernarpoq, taanna oqarpoq.

Taassumalu nunanut allanut unammisartut katerissinnaanngikkunik nunarsuarmi pissartanngorniuteqataanissamut anngunniunnissap ajornakusuulernissaa ernumassutigaa.

- Nunarsuarmi pissartanngorniuteqataaneq annertoorujussuuvoq, unammisartut tamarmik tamanna aqqusaaginnarsinnaanngilaat, amerlasoorujussuillu piffissap ingerlanerani nunarsuarmi pissartanngorniuteqataarusupput. Kisianni aningaasassaqanngikkutta qaqugu nunarsuarmi pissartanngorniuteqataaqqissanersugut takujuminaappoq.

Ivâna Meincke Islandimi ulluinnarni najugaqarpoq, tassanilu Islandimut klubbianni Stjarnanimi unammeqataasarluni. Taamaammat kalaallit nunanut allanut unammisartut sungiusaqatigissagunigit nunanut allanut unammisartut katerinnissaat pisariaqartippaa. Assi © : KNR

Nunanut allanut unammisartut Stavangerimi pissartanngorniuteqataareerlutik pissartanngorniunnermut peqataaqqinnissartik sulissutiginiarlugu – tullianilu unamminerni amerlanerusuni ajugaarusullutik isumaqatigiissutigisimagaat, Ivâna Meinckep oqaatigaa.

Taamaattoqarnissaanulli katerinnerit sungiusaqatigiinnerillu pisariaqartut, taanna oqarpoq.

- Unamminerni ajugaassagutta katerittarnissarput pisariaqartipparput. Ajornanngippallu nunanut allanut unamminerni aamma peqataallutik, taamaalilluta holditut misilittagaqalissalluta. KIsianni aningaasassaqannginneratigut taamaattoqarsinnaanissaata takunissaa suli ajornakusoornerulerpoq.

TAAK-ip aningaasat kukkusumik atorpai?

Kalaallit assammik arsartartut kattuffiata siulittaasuata, Carsten Olsenip 2023-mi arnat assammik arsarnermi nunanut allanut unammisartut nunarsuarmi pissartanngorniuteqataanissamut anngunniunnerannut pissartanngorniuteqataanerannullu aningaasartuuteqangaatsiarnera pissutigalugu aningaasat nungupallattut siusinnerusukkut nassuiaatiginikuuaa. Tamatuma saniatigut angutinut nunanut allanut unammisartunut inuusuttunullu nunanut allanut unammisartunut eqimattanut marlunnut aamma aningaasartuuteqartoqarpoq.

Ivâna Meinckelli assammik arsartartut kattuffiata ukiup sinneranut aningaasassaqarnissaa pillugu missingersuusiorsimannginnera paasiuminaatsippaa.

- TAAK-ip eqimattanik sisamanik nunanut allanut unammisartoqarniarluni nammineq aalajangernikuuaa. Taamaammat aningaasat qanoq amerlatigisut atorneqarnissaannut missingersuusiorluarnissamut pikkorinnerusoqarsimannginnera holditut pakatsissutigingaatsiarparput. Tassa aningaasassaqannginnermi suut kingunerluutaasinnaanersut eqqarsaatiginissaannut pikkorinnerusoqarsimannginnera, taanna oqarpoq.

- Ukiup sinneranut matuneqaannarutta nunanut allanut sanilliulluta katataaqqareerpugut. Unamminerni ajugaassagutta taava katerittariaqarpugut.

Tamatuma saniatigut nunanut allanut unammisartunut pilersaarutit unitsinneqarnerat nunatsinni klubbit allat taamaaliulernerannik kinguneqassanngitsoq neriuutigaa. Unammisartummi – nunanut allanut unammisartutut sungiusarneqanngikkaluartorluunniit – sungiusaannarsinnaanissaat pingaaruteqarpoq.

- Neriuppunga klubbit kalaallit nunatsinni sineriammiittut ataavartumik sungiusarnertik ingerlatiinnassagaat, taava soorlu nunatsinni pissartanngorniunnermi unamminerit pissanganarnerusut unammillerfiunerusut takkussinnaappata suli pitsaanerusumik angusaqarsinnaavugut, Ivâna Meincke oqarpoq.