Nunanut allanut tunngasunut ministeriugallartoq Folketingimut qinigaanngitsoq

Danmarkimi qinersiviit ilaanni Sjællands Storkredsimi taasinerit kisinneqarsimalerput, nunanullu allanut tunngasunut ministeriugallartoq, Jeppe Kofod, Folketingimut qinigaanngitsoq kisitsinerit takutippaat. Socialdemokratit qinersivimmi tassani arfineq-marlunnik qinigaatitaqarput, Jeppe Kofodilli qinersisaasa amerlassusaasa takutippaat naammanngitsut, Socialdemokratit sinnerlugit sassartut akornanni normu 8-tut inissilluni.

Tassa Folketingimut qinigaanngilaq.

Jeppe Kofod Folketingimi ilaasortaanngikkaluarluni nunanut allanut tunngasunut 2019-imi ministerinngorpoq. Taannami EU-Parlamentimi ilaasortaatilluni Mette Frederiksenimit nunanut allanut tunngasunut ministerinngortitaavoq.

Tassa danskit nunanut allanut tunngasunut ministeriusimasut akornanni aappassaanik Folketingimut tulleriinnik qinigaanngitsoortoqarpoq. Anders Samuelsen (LA) nunanut allanut tunngasunut ministeriulluni Folketingimut 2019-imi aamma qinigaanngilaq.

AAMMA ATUARUK Folketingi qinersinerup kingorna ima inissisimaffiulersoq

Jeppe Kofodip taaguussinerit 650-t missaat Folketingimut qinigaanissamut amigaatigisimavai.

Jeppe Kofod qinigaasimanngitsoq paasigamiuk tusarnerlussimalluni, aningaasaqarnermut ministeriugallartoq Nicolai Wammen oqarpoq.

- Nunanut allanut tunngasunut ministeriuvoq pikkorissoq pimoorussilluinnartorlu. Neriulluinnaraluarama qinigaassasoq. Taamaammat qinigaannginnera pillugu soorunami sunnertisimaanngitsuunngilanga, Wammen oqarpoq.

Kofodili qinigaanngikkaluarluni Mette Frederiksen naalakkersuisoqatigiilioreersimaleriarpat nunanut allanut tunngasunut ministeriuinnarnissaminut sapiutinngilaq. Ministerimmi Folketingimut qinigaasimasariaqanngillat.