Folketingi qinersinerup kingorna ima inissisimaffiulersoq
Christiansborgimi atit allagartaat partiillu allaffii marlunngornermi qinersinerup kingorna nikisiterneqarluarput.
Qinersinermi Folketingimi qinikkat agguataarnerannut allannguingaatsiarpoq.
Qinersinermi Socialdemokraatit qinigaanerpaapput, qinigaatitaallu marlunnik ilallutik 50-inik qinigaatitaqarput. Partii qinersisut sisamaannit amerlanerusunit taaguunneqarpoq, ukiuni 20-ni aatsaat taama qinigaalluartigaluni.
Socialdemokraatit partiit allat saamerliusut ilanngullugit amerlanerussuteqaqqalaarput, tassunga nunatsinnit Savalimmiuniillu qinikkat ilaapput, taamaalillutillu naalakkersuisoqatigiinnik nutaanik pilersitsiniarsinnaanngorlutik.
Partiit allat nuannassinnaasut tassaapput partiit pilersinneqaqqammersut marluk, tassa Moderaterne ministeriunerusimasoq, Lars Løkke Rasmussen siulittaasoralugu kiisalu Danmarksdemokraterne Inger Støjberg siulittaasoralugu.
Moderaterne Danmarkimi partiini qinigaanerpaat pingajuulluni Folketingimut 16-inik qinigaatitaqarpoq, Danmarksdemokraternilu 14-inik tigusisinnaalluni.
SF-ip angissusini tigummiinnarlugu qinikkamik ataatsimik siuariarpoq, 15-inillu qinigaatitaqarluni.
Ulloq Venstremut ’alianarluinnartoq’
Danmarkimili partiit nalinginnaasumik annersaaniittartoq, Venstre qinersinerup ullua maannalu aqaguani nuannerpallaanngilaq.
Venstre Danmarkimi partiit annersaata suli tulleraa, kisianni Folketingimi qinigaaffiit 53-init affaannapajaanngorlutik maanna 20-nnanngorput.
Socialdemokratiet: 50
Venstre: 23
Moderaterne: 16
SF: 15
Danmarksdemokraterne: 14
Liberal Alliance: 14
Konservative Folkeparti: 10
Enhedslisten: 9
Radikale Venstre: 7
Nye Borgerlige: 6
Alternativet: 6
Dansk Folkeparti: 5
- Ulloq nuannernavianngitsoq oqaatigineqarsinnaavoq, Jakob Ellemann-Jensen oqarpoq, taassumalu parteeqatini Folketingimiikkunnaartussat inuulluaqqunissai innersuussutigai.
Konservative Folkeparti qinersinissap suaarutigineqarnerani qinigaalluartussatut ilimagineqaraluartut aamma kinguariarput.
Taamaakkaluartorli marluinnarnik ilanngarlutik Folketingimut maanna qulinik qinigaatitaqalerput.
DF ikinnerpaanik qinigaatitaqartoq Radikalellu isatsittut
Aamma Dansk Folkeparti ullumikkut piviusumut iterput. Partii folketingimut 2015-imi qinersinermi partiit annerpaata tullerilerpaa, partiili marlunngornermi qinersinermi taaguussisut 2,6 procentiinnaanit taaguunneqarpoq – Folketingimilu qinigaaffinnik tallimanik tigumminniinnarnissamut naammalluni.
Partii Folketingimi maanna minnerpaalerpoq.
Dansk Folkepartiip siulittaasuata, Morten Messerschmidtip angusat ”maniguuttumik” aamma ”tulluusimaarnartumik” tigullugit qinersinerup unnukkuani erseqqissaatigaa.
- Danskit kissaatigimmassuk maaniippugut, Morten Messerschmidt oqarpoq.
Partii qinersisoqarnissaanik aallarniisoq tassa Radikale Venstre aamma isatsippoq. Mette Frederiksenip minkit pillugit suliaq pissutigalugu qinersinermik suaarutiginninnissaa partiip piumasaqaatigaa, taamaaliunngippallu naalakkersuisut uppisinniarlugit.
Partiili imminut uppisingajaannarpoq. Radikale Venstre Folketingimut qinigaatitanit 16-inik arfineq-marluinnanngorput, maannalu Folketingimi partiimi minnerpaat sisamarilerlugu.
Partiit minnerit siuariartut
Minnerunngitsumillu partiit mikisut arlallit arlalinnik taaguunneqarnertik pissutigalugu qinersinermi ataatsimoornermi nuannassinnaapput.
Alternativet saamerlernut tapersersuisoq, Christiansborgimi marlunngornermi ataasiinnarmik qinigaatitaqaraluarpoq. Taanna pingasunngornermi arfinilinnik qinigaatitaqalerpoq.
Nye Borgerlig talerperlerniittoq qinigaatitai ataatsimik amerlipput, maannalu Folketingimi arfinilinnik qinigaatitaqalerluni, Liberal Alliancelu qinersinnginnermi Folketingimi sisamaannarnik qinigaatitaqartoq maanna 14-inik issiatitaqarsinnaalerpoq.
Taamaallaat Enhedslisten siuarianngilaq. Partii 13-inik qinigaatitaqarluarluni qulingiluaannarnik qinigaatitaqalerpoq.
Nunatsinni Siumumeersoq, Aki-Matilda Høegh-Dam IA-meersorlu Aaja Chemnitz qinigaaqqipput. Aamma Savalimmiuni partiimit Javnaðarflokkurinimeersoq Sjúrður Skaale qinigaaqqippoq. Qinigaasullu aappaa Savalimmiuni Sambansflokkurinimeersoq, Anna Falkenberg nutaatut qinigaalluni.
