Nunaminerals pillugu iliuuserisimasat oqaluuseritinniarpaat

Aatsitassarsiorfik Nunaminerals pillugu Namminersorlutik Oqartussat iliuuserimasaat pillugit allattuisa taamaalilluta nunatsinni aatsitassarsiornerup avataanit tatigineqarnera annaaneqannginniassammat. Inuit Aqatigiit politikkikkut oqaaseqartittagaat, Naaja Nathanielsen taama kaammaattuuteqarpoq.

Nunamineralsimi immikkut ittumik ataatsimeersuartoqarnerata kingorna Nunamineralsip siunissaa pillugu patajaatsumik isumaqatigiittoqanngimmat, Naaja Nathanielsenip kissaatiginartippaa Naalakkersuisut siulittasuat Kim Kielsen inatsisartut aningaasaqarnermut ataatsimiititaliaa piaartumik oqaluttuutissagaa Nunaminerals pillugu qanoq pilersaaruteqarnersoq, suullu eqqarsaatigineqarnersut.

Læs også Siulersuisut siulittaasuata Nunamineralsip ataannarnissaa qularutigeqaa

Eqqissiimisoqariarpat pissusissamisuussaaq Nuna Minerals pillugu qanoq pisoqarsimaneranik nassuiaasiortoqarnissaa, Naaja Nathanielsen allappoq.

- Una pisoq ilikkarfigisinnaasariaqarparput, taamaalilluta periusissiassagut qanoq pitsanngorsarsinnaanngorlugit ilisimaniassagatsigu. Taamaattumik nassuiaammi ilanngunneqartariaqarput Nuna Mineralsip pissusilersorsimanera kiisalu politikkikkut pisut qanoq Nuna Mineralsimut sunniuteqarsimanerat, illuatungiliuttut partiianni politikkikkut oqaaseqartartoq taama oqarpoq.