Nunakkut pisuttumit ajornartoornermi kalerrisaarut aallartittuugaasoq
Kalaallit Nunaanni Politiit ullaassaq ajornartoornermi kalerrisaarummik tigusaqarput. Ajornartoornermili kalerrisaarut kukkusumik aallartinneqarsimasoq maanna paasinarsivoq, Kalaallit Nunaanni Politiit pigaartuisa pisortaat, Jaaku Andreassen oqarpoq.
Politiit kalerrisaarummik ullaaq sisamat eqqaani tigusaqarput, taakkulu Issittumi Sakkutooqarfik suleqatigalugu qulimiguulimmik SAR-imik erngertumik aallartitsipput.
- Ajornartoornermi kalerrisaarut kukkusumik qanoq aallartinneqarsinnaanersoq maanna misissussavarput, Jaaku Andreassen oqarpoq.
Ajornartoornermi kalerrisaarut Ilulissat Uummannallu akornanni aallartinneqarpoq, taannalu angummit nunakkut pisuttumit aallartinneqarsimavoq. Angutip nunakkut pisunnini pissanganartorsiorfiunngitsumik nangeqqippaa, SAR-imiillu qulimiguulik uterteqqinneqarluni.
