Nuna tamakkerlugu peqataaffigineqartumik qimussimik sukkaniuuttoqartalissasoq

- Pilersipparput Avannaata Qimussersui ukiut pingasukkaartumik ingerlanneqartartussaq nutaaq 2021-mi Ilulissani pilersussaq, Hansiaraq Zeeb, Kalaallit Nunaanni Qimussertartut Katttuffianneersoq, taama oqarpoq.

Ukiut pingasukkaarlugit unammissutaasalersussami, taaguuserneqartumilu Avannaata Qimussersui, Ilulissaniinnarlu ingerlanneqartussami, Nunatsinni kalaallit qimmiinik qimuttoqarfinnit annguttut tamarmik Ilulissani unammisinneqartarniarput. Avannaata Qimussersua ingerlaannassasoq, Hansiaraq Zeebip erseqqissaatigaa, imalu nangilluni:

- Avannaata Qimussersui nutaaq aallartinniarsarivarput. Tassani aallaavigivarput kattuffiup pileqqaarneraniilli siunertaasuaannarmat unammersuarneq tamakkiisoq ingerlanneqartassasoq.

AAMMA ATUARUK Qeqqatas hunde får grønt lys til Avannaata Qimussersua

Avanersuarmit, Tunumit Upernavimmiillu Avannaata Qimussersuanut annguttut peqataanissaminnut ilaatigut akissaqarneq ajorput. Taamaattumik Inughuit Qimussersuat aamma Kangiata Qimussersua Kalaaallit Nunaanni Qimussertartut Kattuffianni siorna pilersinneqarput.

Taamaalilluni Avannaata Qimussersuani, maannamullu ukiut tamaasa ingerlanneqartartumi, peqataanissaminnut periarfissaqarneq ajortut Ilulissani ukiut pingasukkaarlugit unammissutaasalersussami, Avannaata Qimussersuini, peqataanissaminnut periarfissaqalissapput.

- Tassa Qimussersuarfiusut tamarmik, Inughuit Qimussersuaninngaanniit, Kangiata Qimussersuaninngaanniit, Upernaviup Qimussersuaningaanniit taavalu massakkut peqataasartut Avannaata Qimussersuanut, taakkua ataatsimut siunertarivarput unammersuarneri ingerlanneqartassasut Ilulissani, Hansiaraq Zeeb, Kalaallit Nunaanni Qimussertartut Katttuffianneersoq, Kathrine Krusemut taama oqarpoq.

Kalaallit Nunaanni Qimussertartut Kattuffiata Inughuit Qimussersuanut, Kangiata Qimussersuanut aamma Avannaata Qimussersuanut illersuisuni aqqutigalugit Avannaata Qimussersuisa ingerlanneqartalernissaanut atatillugu nunatta karsianit tapiissutaasartut qaffanneqarnissaat maanna sulissutigileruttorpaat.

AAMMA ATUARUK Tag test af mistænkte krydsninger af slædehunde