Ataatsimiititaliaq Qimmit akusaanersut qulaajaasoqartariaqarpoq
Qimmilli allanertatut pasineqartut ilumut akuneqarsimasinnaanersut misissoqqissaarneqarnerat aatsaat aallartippoq.
Qimmit akuneqarsimasinnaaneranik pasineqartut piaartumik qulaajaaffigineqarniassammata Aalisarnermut Piniarnermullu Naalakkersuisoq Nikkulaat Jeremiassen qulaajaasariaqartoq, Inatsisartuni Aalisarnermut Piniarnermullu Ataatsimiitsitaliap siulittaasuata Henrik Fleischerip kaammattuutigaa.
Qimmilli allanertatut pasineqartut ilumut akuneqarsimasinnaanersut misissoqqissaarneqarnerat aatsaat aallartippoq.
AAMMA ATUARUK Nunatta qeqqani qimmit qimuttut akuneqarsimasinnaanerat aamma pasitsaanneqartoq
Kalaallip qimmiata qimuttup ilisimatuussutsikkut Qimmeq Projekt-imit misissorneqarnera iluatsillugu, Qeqertarsuarmi qimmip allanertatut pasineqartup DNA-vanik misissuisoqartoq Uumasut Nakorsaanerannit siusinnerusukkut oqaatigineqartarpoq.
Misissuinermi qanoq pingaaruteqartiginersoq misissuisunut ilisimatitsissutigineqarsimanngilaq.
- Misissueqqissaarnissaq oqallisaasorujussuusoq ilisimasimanngilarput. Misissuinerlu maannamut aallartissimanngilarput, aatsaallu aallartillutigu, misissugassarpummi laboratoriami sisamanngorpat misissorneqalissaaq, ilisimatooq Qimmeq projektimi suleqataasoq, Anders Johannes Hansen oqarpoq.
Qimmeq allanertatut pasilliutigineqartoq Qeqertarsuarmiittoq, ungalusamiitinneqartoq naalakkersuisup oqaatigaa.
AAMMA ATUARUK Qimmit pillugit suliaq nutaaq ataatsimiissutigineqarpoq
Qimmerli Qeqertarsuarmiittoq allanertatut kisimi pasineqanngilaq. Sisiumiunimi Kangerlussuarmilu qimminik akusisoqarsimasinnaaneranik aamma pasitsaassisoqarpoq. Pasitsaanneqartulli paasiniaaffigineqareermata misissorneqassanngillat.
Piniarnermut Naalakkersuisoq Nikkulaat Jeremiassen ima oqarpoq.
- Sisimiuni Kangerlussuarmilu pasitssaassinerit ingerlaannaq paasiniaaffigineqarput . Aammalu taakkunanngaanniit paasisat taassaapput namminneq taamaaliortuunatik. Taamaammat iliuuseqarnissaq ajornakusoorpoq massakkuungallartoq taakkununnga tunngatillugu, Naalakkersuisoq oqarpoq.
Qimmeq pineqartoq Qimmeq projektimiit misissugassamik tigusiffigineqarsimalereerpoq.
Kalaallillu qimmiisa qimuttut DNA-vanik misissuleriikkaminnut sanilliullugu misissorneqassasoq misissuisup ilisimatuup Anders Johannes Hansenip oqaatigaa, - Sapinngisarput naapertorlugu piaartumik suliarissuarput. Kisianni ilimanarpoq aatsaat misissuinitsinnit januaarip naanerani inerniliussisinnaanissarput, Anders Johannes Hansen oqarpoq.
Inatsisartut Aalisarnermut, Piniarnermut Nunalerinermullu Ataatsimiititaliaata Piniarnermut Nunalerinermullu Naalakkersuisoq piaartumik pisoq pillugu qulaajaaqqullugu kaammaatuuteqarfiaat. Naalakkersuisullu suliaq kinguarsassanngikkaat, piaartumik aaqqiissutissamik suliaqarnissaat ataatsimiititaliap inassutigalugu.
Kommune Qeqertallip borgmesteriata, Ane Hansenip, qimmip Qeqertarsuarmi allanertatut pasineqartup, allanertaanera ilumut uppernarsineqassappat, siusinnerusukkut pisartut assigalugit toqunneqartariaqarnissaa allaqqunneqarsinnaassanngitsoq, Qanoruumut oqaatigaa.