Assi: Ruiz-Martinez Jose D.

Qimmit akusaasorineqartut qimussersuarmut peqataasinnaanngortut

Sisimiuni nunaqarfiinilu Itillermi, Sarfannguani Kangerlussuarmilu kalaallit qimmii qimminik allanik akuneqarsimanngimmata, sumiiffinnit taakkunanit qimussertartut Avannaata Qimussersuarnut peqataasinnaanngoqqipput.

Kalaallit Nunaanni Qimussertartut Kattuffiat taama nalunaaruteqarpoq. 

Sisimiuni taassumalu nunaqarfiini kalaallit qimmiisa qimminik allanik akuneqarsinnaanissaannut pasilliisoqarmat, taakkunanit qimussertartut qimussertartut kattuffiata aaqqissuussaanut tamanut, ilaatigut nuannarineqarluartumut Avannaata Qimussersuanut killiligaanngitsumik siorna oktobarimi mattunneqarput.

AAMMA ATUARUK Qimmit akiuussutissalernissaannut piumasaqaammit immikkut akuersissuteqarneq sivitsorneqartoq

Sisimiunili nunaqarfiinilu qimmit qimuttut akuneqarsimanngitsut ilaatigut Uumasut Nakorsaaneqarfiata Qeqqata Kommuniatalu misissuinerisa takutippaat.

- Soorunami iluaallappugut tamatta. Ilaasortallu. Sisimiuni qimussertartut peqatigiiffianni,

Qimusseq Sisimiuni, siulittaasup tullia, Aron Fleischer, taama oqarpoq.

Qeqertarsuarmit nunaqarfianiillu Kangerlummit qimussertartut Kalaallit Nunaanni Qimussertartut Kattuffiata aaqqissuussaanut tamanut suli mattussaaqqapput.

AAMMA ATUARUK Avannaata Qimussersuanut peqataaniaraanni qimmit kapineqarsimasariaqarput

Taakkunani kalaallit qimmii qimminik allanik akuneqarsimasimanissaat suli pasinaarneqanngilaq.

Qimmip pasilliutigineqartup DNA-vanik misissuinerup qanittukkut naammassineqarnissaa naatsorsuutigineqartoq Uumasut Nakorsaaneqarfianit KNR-imut ilisimatitsipput.

Qimmillu akusaasimasinnaanerannut pasilliuteqartoqarmat, mattussisariaqarlutik qimussertut kattuffiannit isumaqarput. 

Kalaallimmi qimmiisa qimminik allanik akuneqannginnissaat kattuffiup isumaginiartussaavaa.

- Uagut nammineerluta misissuisinnaatitaanngilagut aamma annerusumik qanoq iliuuseqarsinnaatitaanngilagut. Kisiannili aaqqissuuttagarput - Avannaata Qimussersua - taanna uagut oqartussaaffigivarput qanoq ingerlassanersoq. Aammalu tassani pingaartissimavarput - qimmitta illersorneqarneranik siunertaqartuugatta - qimmitta allanik akuneqarani piuinnarnissaa, Hansiaraq Zeeb, Kalaallit Nunaanni Qimussertartut Kattuffianni allatsi, oqarpoq.

Sisimiuni qimussertartut peqatigiiffiat Avannaata Qimussersuanut Sisimiuni marsip pingajuani anngunniuutitsissaaq, meeqqallu Avannaata Qimussersuaaraanut februaarip 16-ani anngunniuutinneqassallutik.

AAMMA ATUARUK Qimmit qimuttut qallunaat qimmiinik akusaanersut januaarimi paasineqassasoq

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat