Kulturi

Nuna tamakkerlugu katersuiniarnermi isumassuineq sammineqassaaq

Peqatigiiffik kalaallit meerartaannik aallussaqartoq, Foreningen Grønlandske Børn, aningaasanik nuna tamakkerlugu unnugu nalunaaqutaq arfineq pingasuniit katersuiniartitsissaaq, KNR TV-lu tassannga toqqaannartumik aallakaatitsissaaq.

Maria Motzfeldt, Maren-Louise Poulsen Kristensen

Allattoq Sara K. Jakobsen

oktobarip 10-at 2014 14:10

Katersuiniarnermi sinneqartoorutit peqatigiiffup suliniutaanut marlunnut atorneqassapput, tassaasunut "Sapiik" aamma "Takusinnaaviuk?".

- Suliniut ”Sapiik” tassaavoq inuusuttut inusuttoqatiminnit ikorfartorneqarnissaannik suliniut. Ullutsinni inuusuttorpassuit nalusarpaat siunissami sussanerlutik ilinniaqqinnissaminnullu unittooqqasarlutik, inersimasuniit tapersersorneqarnissartik amigaatigisarmassuk, peqatigiiffiup aqqutissiuussisartua Mads Lumholt oqarpoq.

Suliniut, illoqarfinni Ilulissani, Nuummi Qaqortumilu ingerlanneqassaaq.

Aallakaatitsinermi toqqaannartumi aamma suliniut taaguuteqartoq "Takusinnaaviuk?" ilanngutassiarineqassaaq, maqaasineq kiserliornerlu sammineqassallutik. Suliniut "Takusinnaaviuk?" meeqqanik, isumassuinermik sumiginnaanermillu sammisaqarfiuvoq.

Aamma atuaruk Nuna tamakkerlugu katersuiniarneq 2014 aqagu pissaaq

Aningaasanik tunissuteqartut eqquinissaminnut periarfissaqarput, suliffeqarfiit arlaqartut eqqugassanut tapiissuteqarput. Eqqugassat annersaat tassapput aningaasat 10.000 koruunit, taakkulu angalanermut atorneqartussaapput.

TV-kkut isiginnaartut Katuamilu tusarnaariat nipilersortartunik tusaamasanik arlalinnik aliikkusersorneqarnissartik qilanaarisinnaagaat, Mads Lumholtip oqaatigaa.