Nuna tamakkerlugu katersuiniarneq 2014 aqagu pissaaq
Katersuiniarnermi nipilersortartut tusaamat tusarnaartitsillutik aliikkusersuissapput, ilaatigut Simon Lynge, Angu Motzfeldt, Varna Nielsen, Juaaka Lyberth aamma arnat pingasuusartut Arktjiks, Nukaaka Coster-Waldaumit, Aviaja Lumholtimit Karina Møllerimillu inuttaqartut.
Aammattaaq katersuiniarnermi matumani qulequttat sammineqartut, maqaaasineq kiserliornerlu, pillugit ilanngutassiaqarumaarpoq.
Tamatta asanninnermik pisariaqartitsigatta
- Nunatsinni Danmarkimilu sulinitsinni meeqqanik inuusuttunillu nuannersorpassuarnik naapitaqartarpugut, kisianni meeqqat inuusuttullu aamma artorsaateqarput maqaasisaqarlutik, kiserliorlutik ujariatsisaqarlutillu. Imaassinnaavoq angajoqqaamik, aanaamik, ikinngummik, sammisanik nuannersunik imaluunniit peroriartorfimmik maqaasisaqarneq. Kisianni aamma imaassinnaavoq ilaqutariinni qaninnerni isumassuinermik qanilaarnermillu maqaasisaqarneq.
- Maqaasineq kiserliornerlu sammisarivarput tamatta takuneqarneq tusaaneqarlu pisariaqartikkatsigu, taavalu tamatta asanninnermik pisariaqartitsigatta. Illit allannguinissamut periarfissaqarputit, Peqatigiiffik Kalaallit Meerartaat taama allappoq.
Sinneqartoorutit peqatigiiffiup suliniutaanut marlunnut atorneqassapput
Sapiik taassavoq inuusuttut inuusuttoqatiminnik ikorfartorteqartinnissaannik suliniut Ilulissani, Nuummi Qaqortumilu ingerlanneqartoq, inuusuttullu meeqqat atuarfiata kingorna ilinniagaqalernissaannut tapersersuinissamik kajumilersitsinissamillu siunertaqartoq. Suliniutillu aappaa Takusinnaaviuk? meeqqanik, isumassuinermik sumiginnaanermillu, ilaatigut filmiliat atorlugit, sammisaqarfiuvoq.
Iggu Challenge
Iggu Challenge tassaavoq tv-kkut nuna tamakkerlugu katersuiniarnermut atatillugu unammisitsineq. Unammisitsinermut peqataaniaraanni videomik sekundit qulit missaannik sivisussusilimmik immiussisoqassaaq, immiussamilu kisimiilluni peqateqarluniluunniit nuannersumik eqitaarisoqassaaq naggasiutigalugulu suaarluni ‘Iggu Challenge!’
Video Facebook.com/iggu2014-imut ikkunneqassaaq, aammali nammineq Facebookimi qupperisamut ikkunneqarsinnaavoq allalluni #iggu2014
Iggu Challengemi ajugaasoq KNR TV-kkut tallimanngornermi oktobarip qulingani katersuiniartoqarnerani nalunaaqutaq qulit missaani toqqarneqassaaq, aammattaaq videoliat pitsaanersiorlugit aallakaatitsinerup ingerlanerani takutinneqartassapput.
Aammattaaq videoliat 'likes'-inik pissarsinerpaasut pingasut arlaat inersuarmi isiginnaartunik toqqarneqarumaarpoq.
Videoliassamut Peqatigiiffiup nittartagaani isumassarsiortoqarsinnaavoq, Peqatigiiffik eqitaaraluni videoliassamut siunnersuutinik 50-inik tassunga ikkussisimavoq.
SMS-ikkut tunissuteqartoqarsinnaavoq
Katersuiniarnermi SMS-ikkut tunissuteqarnissamut periarfissaqarpoq, tamannalu pisinnaavoq ataani allaqqasut arlaat 1810-imut nassiunneratigut:
IGGU A, 50 kr.-inik tuniutteqarniaruit, IGGU B, 100 kr.-inik tunissuteqarniaruit aamma IGGU C, 150 kr.-inik tunissuteqarniaruit.
Tunissutini assigiinngitsuni pingasuusuni makkuninnga pinnattaassaqartitsilluni makitsisoqassaaq:
IGGU A: Erinarsortartup eqqumiitsuliortullu nuannarineqarluartup Enok Poulsenip qalipagaa, IGGU B: Nalaasaarfiit Arctic Livingimeersut. IGGU C: Nunatta angalatitsivianit angalanissamut gavekorti 10.000 koruuninik naleqartoq. Eqqugassat assilineqarneri Peqatigiiffiup Kalaallit Meerartaata nittartagaani takusinnaavatit.
