“Atuariartorumanngittarneq nunatsinni ilaqutariippassuarnut sunniisarpoq, meerartavut ajunnginnerusumik siunissaqartikkusukkutsigit, inuiaqatigiinni ajornartorsiuterujussuartut isigisariaqalerluinnarparput.”

Taama Kirstine Olsenip Aalborg Universitetimi immikkut sammisaralugu atuariartorumanngittarneq (skolevægring) pillugu allaaserisaqartoq oqallissaarummini aallarniivoq.

- Atuariartorumanngittarneq nassuiassallugu ajornarpoq, kalaallisummi aalajangersimasumik oqaaseqartinnginnatsigu. Malunnaatiliuvormi sivisuumik atuariartorsimannginnermi meeqqamut ilaqutaasunullu sunniinermik kinguneqalertartoq, taanna oqarasuaatikkut taama nassuiaavoq.

Kirstine Olsenip Aalborg Universitetimi kandidatinngorniarluni immikkut sammisaralugu atuariartorumanngittarneq (skolevægring) pillugu allaaserisaqarpoq. Foto: Privat

Atuariartorumanngittarneq pillugu kalaallisut oqaasertaqannginnera ajornartorsiutaavoq, Louise Pindstrup Scavenius Ilisimatusarfimmi ilinniarneq pillugu ilisimatusartoq isumaqarpoq. Atuariartorumanngittarnerulli pileriasaartarnerata peqqutaa paasissallugu pingaarneruvoq.

- Atuartut atuariartorumanngittarnerannut toqqaannartumik tunuliaqutaa nalugatsigu ajornartorsiuterujussuuvoq, taanna oqarpoq nangillunilu:

- Ilisimavarpulli atuarfimmut ilaasutut misigisimanngittarnerujussuup atuariartorumanngittarnermut takussutissaasinnaasartoq. Taamaammat meeqqat atuarfianni qanoq peqatigiinnerulernissamik pilersitsisoqarsinnaanersoq qiviassallugu inissaminiippoq, Louise Pindstrup Scavenius oqarpoq.

Meeqqat siunissaraavut

Qineqqusaarnermi meeqqat isiginngitsuusaarneqartut, Kirstine Olsen isumaqarpoq.

- Oqaluttuarisaanermi sunniuteqartumik qinersinissaq aallartilerpoq, inuiaqatigiiusugut pingaartumik meeqqat siunissavut ilanngunneqarnissaat pingaaruteqartuusoq isumaqarpunga. Taakkuuppummi siunissami sulisussanngortussat, taanna oqarpoq.

Politikerit oqaluuserisassaannut atuariartorumanngittarneq siullertut allaqqanngilaq, meeqqalli atuarfiat qanimut misissuiffigineqarnissaa naleqqulluinnartuusoq, Anna Wangenheim Demokraatini Inatsisartunut ilaasortaasup miserratiginagu oqaatigaa.

Meeqqat atuarfianni atuartut atugarissaarneri pillugit politikkikkut oqaluuserisassani pingaarnerusariaqaraluartoq, Anna Wangenheim Demokraatineersoq isumaqarpoq. Assi © : Demokraatit

- Atuariartorumanngittarneq pimoorunneqartariaqarpoq. Meeqqat atuarfianni soraarummeertut kisitsisinngorlugit affai missiliorlugit ingerlaqqinngitsoortarneri takusinnaavagut taakkulu misissuiffigisariaqarluinnarpavut, taanna oqarpoq.

Nuna tamakkerlugu atuariartorumanngittarneq pillugu najoqqutassanik peqanngitsoq, Anna Wangenheimip ilanngullugu uparuarpaa.

- Ataatsimoortumik ilisimasaasiveqanngilaq. Tamanna nuna tamakkerlugu iliuuseqarnissamut pilersaarutaasussanngorniassammat ukkatarineqartariaqarpoq. Atuariartorumanngittarneq pileraangat nalinginnaasumik pinaveersaartitsineq sunniuteqanngitsumik suliarineqarsimasarpoq. Tamanna ullumikkumut naleqqiullugu ajunnginnerusumik siusinaarluta iliuuseqarfigisinnaanngortariaqarparput.

Kisianni qanorpiaq iliorluni atuartut ajutuuinnginnerini ikiorserneqarsinnaappat?

- Assersuutigalugu meeraq ersinngitsumik nappaateqarnersoq allarluinnarmilluunniit peqquteqarnersoq misissueqqissaarneq atorlugu Iliuuseqartoqartariaqarpoq. Meeqqat ataasiakkaat atuarfimmi suut ajornartorsiutigineraat paasiniassallugit pisariaqarpoq, Anna Wangenheim oqarpoq.

Ilinniartitsisut pisortallu sakkussaminnik amigaateqartut

Ilinniartitsisut atuarfimmilu pisortat pisuni ajornartorsiorfiusuni isumaginninnissamut sakkussaalatsisarnerat pissutaalluni meeqqat ataasiakkaat arajutsineqartartut, Ilisimatusarfimmeersoq Louise Pindstrup Scavenius oqarpoq.

- Tamanna ilisimatusarninni takukulavara: “Nå, atuartoq maaniikkunnaarsimavoq”. Ilinniartitsisup atuartup atuanngitsoornera allappaa qanorli iliuuseqarfigissallugu nalullugu. Taava tassani atuartoq annaaneqareerpoq, nassuiaavoq nangillunilu:

- Ilinniartitsisut pisortallu allannguerusunnginnerat nalaanneq ajorpara, kisianni (meeraq, aaqq.) qanoq iliuuseqarfigissallugu nalornisut nalaattarpakka.

Meeqqat atuarfianni atuariartorumanngittarneq immaqalu sinaakkutanik isumaliuteqaqqinnikkut ilisimatusarfiginerusariaqartoq, Louise Pindstrup Scavenius isumaqarpoq.

- Sooq atuaqatigiit taamatut agguataarneqassappat, sooq ilinniartitsisoq ataasiinnaassava, imaluunniit sooruna atuanngiffiit taamatut inissisimasut aamma qanoq najugaqartut atugarisaannut tulluarnerusumik atuarfimmik pilersitsisoqarsinnaava?

Atuartup atugarissaarnissaa suleqatigiinnikkut siuarsarneqassaaaq

Meeqqat atuarfianni atuartut atugarissaarnissaannut pitsanngorsaanissamut suleqatigiinneq pingaaruteqarluinnartuusoq, Kirstine Olsenip Anna Wangenheimillu erseqqissarpaat:

- Atuariartorumanngittarnermik pinaveersaartitsiniarutta suleqatigiissaagut. Malunnaatilimmut tassunga politikerit, atuarfiup pisortai, angajoqqaat susassaqartullu allat qanoq pinaveersaartitsisinnaanerluta paasiniassallugu pingaaruteqarpoq, Kirstine Olsen oqarpoq.

Meeqqat atuarnerat kisimi misissuiffigineqartariaqanngilaq kisianni aamma sunngiffii ilaqutariinnilu atugarisaat ilanngunneqartariaqarput, Anna Wangenheim isumaqarpoq.

- Nunatsinni meerarpassuit angerlarsimaffiup avataanut inissinneqarnikuupput, taamaattumik meeqqat atugarissaarnerat atuarfiup iluani avataanilu inuiaqatigiinnit qanoq sunnerneqartigisarnersoq misissorneqartariaqarpoq. Tamanna erseqqissumik pilersaarusiortariaqarparput, taanna naggasiivoq.