Nuna ikuallattoq ima qamisarneqassaaq
Qatserisartut 38-t qallunaat illersornissaqarfiata timmisartorsuanut Herkulesimut ilaallutik Danmarkimit Nunatsinnut marlunngornermi qangattarput, taakkualu Nunatsinni qatserisartut Sisimiut aamma Kangerlussuup akornanni nunamik ikuallattumik qamisaaneranni ikiuutissapput.
Nunamimi ikuallanneq qaminneqanngikkuni, nunap iluani ukiuunerani ikumarusaarsinnaasoq, aasaqqippallu ikummaqqissinnaasoq, ilaatigut aarleqqutigineqarpoq.
- Taamaammat pisoq pinartuuvoq. Tassami nunami ikuallanneq sumiiffimmut ukiiffigisinnaasaminut siaruarsinnaavoq, taamaalilluni aasaqqippat ikummaqqissinnaassalluni. Tamannalu pinngitsoorteriassavarput, Danmarkimi upalungaarsimanermut ataatsimiititaliarsuarmi nunani tamalaani upalungaarsimasut pisortaat, Jens Oddershede, oqarpoq.
AAMMA ATUARUK Tupannartorujussuuvoq
Qallunaat qatserisartut taakku 38-t qatserinermut atortut 13 tonsitut oqimaatsigisut nassarlugit Sisimiunut ippassaq unnukkut tikipput. Qatserisartullu sorlaat nunap iluani ikumaruusaartut qamisassavaat.
Taamaattumik ikuallattoq siullertut killilersorniarneqarpoq.
- Siullertut ikuallaffik killilerniarneqassaaq, tassa inneq siuaruatsaaliorlugu. Uanilu pingaarnertut kuup illuatungaanut siuaruatsaaliorneqassaaq, kuup illuatungaanimi nunatarujussuaqarpoq, Jens Oddershede oqarpoq.
AAMMA ATUARUK Qatserisartut 38-it Danmarkimiit ikiuukkiartussasut
Qatserisartullu issoq ikuallattoq qamisarniarlugu ilaatigut nunamut kapuutinik ikkussuissapput.
- Slangit qatserinermullu atortut assigiinngitsorpassuit nassarneqarput. Soorlu aamma nunamut kapuutit. Taakkua nunamut kapputeriarlugit nunap ilua imerterneqartarpoq, taamaalilluni sorlaat nunap iluani ikumasut qamisarneqarsinnaasarmata, taakkuami nunami ikuallanneq qaminneqarsorineqareeraluartoq ikumarusaarsinnarlutik ikummaqqissinnaasarput, Jens Oddershede oqarpoq.
Upalungaarsimanermut ataatsimiititaliap ikuallattup qamisarnissaanut ikiuunnissartik sapaatip akunnerini marlunnik sivisussuseqarnissaa naatsorsuutigaa, suliartortitsinerallu 3 millioner koruuninik naleqarpoq.
