Nulia ikinngutaalu Erik Jensen pillugu: Killiliinissani ilinniassavaa
Kim Kielsen Siumumi ukiuni arfinilinni siulittaasooreersoq Erik Jensen partiimut siulittaasussatut qinerneqarpoq.
Siulittaasussamik qinersineq naligiiffiungaatsiarpoq, Erik Jensen 39-nit qinerneqartoq Kim Kielsen 32-nit qinerneqarpoq.
Partiimi maanna nutaamik siulittaasoqarneq sungiunniarneqartussanngorpoq.
AAMMA ATUARUK Erik Jensen Siumumi siulittaasunngortoq: Tulluusimaarpunga
Erik Jensenip sulisimaneranut allagartami akissarsiaqanngitsumik siulersuisunut ilaasortaatut suliaqangaatsiarsimasoq, assammik arsarnermi isikkammillu arsaannermi sungiusartarlunilu meeqqanut inuusuttunullu ukiut 23-t sinnerlugit sungiusaasuusoq allassimavoq. Nammeq aamma isikkamik arsartarpoq.
Erik Jensenip nulia aperigaanni taassuma uia nuannaartuuvoq, inussiarnersoq oqalukkumatoorujussuarlu. Aammali nuliata oqarnera naapertorlugu angutaavoq piumassuseqarpallaalaartoq.
Heidi Ramsøe. Assi: Malik Brøns
- Ilaanni noqittariaqartarpara: haluu unilaarit ilaa? Piumavallaaleraangami aallarsartarami tassa suna tamaat angorusutani anguniarsaralugu. Aamma suliassani sunaluunniit upperigaangamiuk nalunngikkaangamiullu ajunngitsumik ingerlasussaasoq unitsitassaajunnaarsinnaasarpoq. Heidi Ramsøe oqarpoq.
Taakku marluullutik pingasunik qulinik, 14-inik 24-nillu ukiulinnik paneqarput.
Angut ulapittoq
Nuliata angutitut sulerusussusilittut tatiginartutullu, aammali imminut eqqarsaatiginissaminik puiortartutut nassuiaatigaa.
- Sanngiiffigisinnaasaatut oqaatigisinnaasara tassaavoq aamma eqqaamasariaqartassagaa ilaannikkut naameersinnaasarnissani. Tassa taanna sanngiiffigivaa. Ilaqutariittut inuunermi aammalu politikkimik sulinermi taanna pingaaruteqartorujussuuvoq aamma naameersinnaaneq killiliisinnaanissarlu, nulia oqarpoq.
AAMMA ATUARUK Kim Kielsen siulittaasunngunngitsoq: Oqiliallannaq
Erik Jensen aamma Heidi Ramsøe 19-inilli ukioqarlutik naapinnerminninngaat maannamut ukiuni 26-ni aappariipput. Taassuma uimi politikkikkut timersornermilu ulluinnarni ulapittarnera sungiussimavaa. Erik Jensenilli Inatsisartut ataatsimiinneranni Nuummiinnerani Sisimiuni angerlarsimaffianni ilaatigut kiserliornarsinnaasarpoq.
- Soqutigisannik tapersersortuaannarpaanga, saninniittuaannarpoq. Taamammat soqutigisaanik aamma tapersersussallugu isumaqarpunga.
Erik Jensenip naaggaarsinnaaneq ilinniassagaa
Siumup ataatsimeersuarnerani - siulittaasumik taasisoqannginnerani - Qeqqata Kommuniani borgmesteri, Malik Berthelsen oqalugiarluni Erik Jensenimut tapersersuinerminik oqaaseqarpoq.
Immaqa tamanna eqqumiippallaanngilaq, Malik Berthelsenimi Erik Jensenilu inuusuttullutilli ilisarisimasariilerput, tamarmillu Sisimiuni peroriartorlutik.
Malik Berthelsen aamma Aki-Mathilda Høegh-Dam Erik Jensenimut tapersersuinerminnik oqaaseqartut. Assi: Malik Brøns
Malik Berthelsenip Erik Jensen inuttut ikiuukkumatuutut ulapinnissaminillu nuannarisaqartutut ilisarisimavaa.
- Erik ukiut 25-t missaat ilisarisimasaara. Taassuma naaggaarnissaminik puiugaqartarnini sanngiiffigisinnaavaa. Ilaqutariit politikkillu iluani naaggaarsinnaanissaq killiliisinnaanerlu pingaaruteqartorujussuupput, Malik Berthelsen oqarpoq.
AAMMA ATUARUK Immikkut ilisimasalik: Taamaammat Kim Kielsen Erik Jensenimut ajorsarpoq
Erik Jensenip killiliilluarsinnaanerulernissani naaggaarsinnaalernissanilu pikkorinnerulerfigisariaqarlugit nassuerutigaa.
- Taanna ilinniagassarivara, inuttut aamma pikkorinneruffigisariaqarpara taanna agguaallugillu suliassat ilai, pikkoriffiginerunissaa taanna suliassama aamma ilagivaat. Aamma tunuliaqutaqarluarpunga ikiortissaqarluarlungalu, taamaattumik taanna qularutiginngilara amma iluatsikkumaarlugu, siulittaasunngortoq oqarpoq.
- Ajugaarusussuataarusussuseqartarpunga, piumassuseqartorujussuusarpunga. Kisianni aamma inuppalaartuuvunga, ammasoq kikkunnilluuniit tamanik oqaloqateqarsinnaasoq, tikilluaqqusisoq.