Nukingisaarisoqaalukkarluartoq Inatsisartut inunnik taasisitsinianngikkallartut
Namminiilivinnissamik siunnersuutit upernaakkut ukiakkullu ataatsimiinnerit tamakkiusallugit oqaluuserisassanngortinneqartarput.
Aamma upernaaq manna ataatsimiinneranni taamaappoq, namminiilivinnissamummi inunnik taasisitsinissamik inatsisissatut siunnersuutit marluk upernaaq manna aamma oqaluuserisassanngortitanut ilaapput.
Siunnersuummi siullermi ataatsimiititaliamik inunnik taasisitsinissaannarmik suliaqartussanik ukiortaamik pilersitsinissaq, Siumup siunnersuutigaa. Nunatta inui ilumut namminiilivikkusunnersut qulaajarniarlugu tamanna pillugu inunnik taasisitsisoqassasoq, Atassutip aamma siunnersuutigaa.
Inatsisartulli namminiilivinnissamik inunnik taasisitsinianngikkallartut erserpoq.
Tamanna upernaakkut ataatsimiinnerup ulluani kingullermi marlunngornermi, siunnersuutit taakkua marluk aappassaaneerlugit suliarineqarfianni, paasinarsivoq.
Tassami namminiilivinnissamik inunnik taasisitsinnginnermi immikkoortunik assigiinngitsunik qulaajaaqqaarnissamik imaqartumik Inatsisinut Ataatsimiititaliami amerlanerussuteqartut, IA-meersut Siumumeersullu inatsisissami allannguutissatut siunnersuuteqarput. Allannguutissatullu siunnersuut Inatsisartuni marlunngornermi ataatsimiinnermi Inatsisartut amerlanerussuteqarfiuvoq.
Tassa Inatsisartut qaammatit arfinillit missaat qaangiuppata ukiaru ataatsimiilertinnagit qulaajaaqqaartoqassaaq.
Siunnersuutit pitsaaquteqarlutillu nangaanartoqartut
Partiit arlaqartut namminiilivinnissamik siunnersuutit taakkua marluk oqallisiginerini akuersaarpaat, siunnersuutinik taaakkuninnga marlunnik naapeqatigiisitsissutaasumik aalajangerput.
Inatsisissatut siunnersuutit taakkua marluk Inatsisartut Inatsisinut Ataatsimiititaliaanni qaammatip siulianili suliarineqareersullu, Inatsisartut allatut aalajangerput. Siunnersuutit pitsaaqutai nangaanartortaallu aammali inunnik taasisitsinissamut qulakkeeqqaagassat oqallisingaatsiareerlugit taamaaliorput.
Assersuutigalugu inunnik taasisitsinissaq Inatsisartunut qinersinissamut ilanngutinngikkaanni 2 millionit koruunit missaannik akeqassangatinneqarpoq.
Aningaasat taakkua aappaagumut aningaasanut inatsissatut siunnersuummit Inatsisartut ukiaru ataatsimiinnerminni akuersissutigisassaannit aaneqartussaassagaluarput.
Inunnilli taasisitsinissaq Inatsisartunut qinersinissamut ilanngutiinnarniarpassuk akikinnerussaaq, taamaaliorunilli inuit aappaannaanut isiginiarnerannik kinguneqarataannaalluni.
