Notre Damep ikuallanneranut sikaritsi pissutaagunartoq
Parisimi oqaluffissaarsuup Notre Damep ikuallarujussuarneranut sikaratsi imaluunniit innaallagissap aqqutaata kissattoornera pissutaassasorineqarput. Frankrigimi unnerluussisussaatitaasut oqaaseqartartui taama oqarput. Piaaraluni ikuallatsitsisoqarsimaneranut aamma takussutissaqannginnerarpaat.
Peqqissaartoqarsimannginnerali imaluunniit mianersuaalliortoqarsimanera oqartussat aalajangiusimavaat - soorlu assersuutigalugu sikaritsi qamilluarneqanngitsoq pissutaasinnaassasoralugu.
Parisimi unnerluussisussaatitaasut pisortaata, Remy Heitzip, oqaatigaa misissuinerugallartut takunnissimasut 100-t sinneqartut killisiorneqarnerinik tunngaveqartut.
AAMMA ATUARUK Notre-Damep ikuallannera pissutigalugu aqerlumik mingutsitsisoqartoq
Apriilip 15-iani ikuallattoqarnerani oqaluffissaarsuup napasuliaa qaliaalu nakkaapput. Ikuallarujussuartoqarnerani oqaluffissaarsuup napasuliaa nutarsarneqaleruttorpoq, taamaattumillu ikorfarsuarnik ungaluneqarsimalluni. Taakku sapaatit akunneranni uani piiarneqassapput.
- Ikorfarsuit ruujorunik 50.000-it missaannik katitigaasut ikuallattoqarnerani uunnarujussuarput 800 gradit sinnerlugit uunartigilerlutik, oqaluffissaarsuup sanaqqinneqarnissaanik aaqqissuisuni aqutsisoq Christophe-Charles Rousselot taama oqarpoq.
Ikorfarssuit piiarneqarnissaat pisariusupilussuussasoq aamma oqaatigaa, iluarsartuusseqqinnissap annertuup aallartinneqannginnerani iigarsuit allallu qajannaarneqaqqaartussaammata.
AAMMA ATUARUK Notre Damep sanaqqinneqarnissaanut milliardilikkaanik aningaasaliisoqarpoq
Oqaluffissaarsuup ukiunik 850-inik pisoqaassuseqartup ikuallannginnerani inunnik 13 millioninit ukiumut iserneqartarpoq. Iserfiginissaa maanna navianarpallaarpoq.
Oqaluffissaarsuaq ukiut tallimat iluanni iluarsartuunneqarluni naammassineqariissasoq Frankrigip præsidentiata Emmanuel Macronip nalunaarutigaa. Tassa imaappoq, Notre Damep iluarsartuunneqarnera ukioq 2024 nallertinnagu naammassineqariissaaq. Frankrigimi ukioq taanna OL-ertoqassaaq.
Oqaluffissaarsuup ilaursartuunneqarneranut tunissuteqarusuttut 850 millionit eurot angullugit, 6,4 milliardit koruunit missiliorlugit, tunissuteqarniarlutik neriorsuutigisimavaat.
/ritzau/AFP
AAMMA ATUARUK Parisimi oqaluffissuaq Notre Dame ikuallattoq
