Kuannersuarni aatsitassarsiortoqalissagaluarpat ujaqqat qaartitikkat qanoq suliarineqaqqittarnissaat suli aalajangerneqanngilaq.

Seernartulinnik kinitsiviliorneq periarfissanut Naalakkersuisut piviusunngortikkusutaannut ilaavoq. Taamaassappat akoorutissat kemikaliat 300.000 tonsit tungaanut ukiumut atorneqartassapput.

Tamanna avatangiisinut illersuiniaqatigiiffimmit NOAH-meersumit isumaqatigineqanngilluinnarpoq.

- Avatangiisinik Kuannersuarniillu Narsamut erngup aqqutaanik immamillu mingutitsinani taamak iliortoqarsinnaaneranik eqqarsaat piviusorsiunngilluinnarneruvoq, Niels Henrik Hooge, KNR-imut oqarpoq.

Ilisimatuut: Sukumiisumik misissuisoqartariaqarpoq

Akoorutissat kinitsivimmiit tatsimut eqqaaviusumut sapusialimmut eqqarneqartassapput, nunallu iluani tatsip naqqaniittumi ukiuni 10.000-ini toqqorsimaneqassallutik. Tamanna amiilaarnarsinnaasoq Greenland Mineralsip pisortaata isertuutinngilaa, neriulluarporli.

- Amiilaarnarpalussinnaavoq. Piviusorli tassaasinnaavoq avatangiisinut inuillu peqqissusaannut ernummassutaasariaqanngitsunik atuutilersinneqartoq, John Mair KNR-imut oqarpoq.

AAMMA ATUARUK Naalakkersuisoq: Kuannersuarni seernartulinnik kinitsivik isumassarsiatsialaavoq

Greenland Mineralisip eqqagassanik toqqorsivissaanit mingutsitsisinnaasunik seerisoqarsinnaanera pillugu inerniliuussaat eqqarsaatersornerinnarmik nalilersuinermit ilimatsaassanillu tunngaveqartut, Pinngortitaleriffiup Aarhusimilu Univesitetsip tusarniaanermut ataatsimut akissutaanni allaqqavoq.

Taamaammat suliap akuerineqarsinnaanissaa sioqqullugu sumiiffimmi sukumiisumik misissuisoqartariaqartoq, taakkua siunnersuutigaat.

Suli aalajangertoqanngitsoq

Kujataani innuttaasut ataatsimiisinneqareerpata tusarniaasoqareerpallu Kuannersuarni seernartulinnik kinitsiviliortoqassanersoq allatulluunniit iliortoqassanersoq aatsaat aalajangerneqarumaartoq avatangiisinut naalakkersuisoq nassuiaavoq.

- Aattaallu tassanngaanniit ilumut tassunga sammivimmut ingerlasoqarniarnersoq aalajangersarneqartussaavoq, Jess Svane taama oqarpoq.

AAMMA ATUARUK Greenland Minerals: Kalaallit Nunaat EU-mi pisiortorfinni annerpaanngorsinnaavoq

Kuannersuarni seernartulinnik kinitsiviliortoqarnissaa Naalakkersuisut kissaatigigaat aatsitassanut naalakkersuisoq, Jens Frederik Nielsen KNR-imut sapaatit akunnerata siuliani KNR-imut oqarpoq.

Taamaaliornikkut suliffissat akileraarutitigullu isertitat amerlanerussasut taanna isumaqarpoq.