Niviaq appisaluussivoq: Oqalugiaataa attortinnartoq uani atuarsinnaavat
Taassuma oqaatigereernikuuaa, ippassarli suli nipitunerusumik oqaatigaa.
- Nunatsinni imminut toquttut nunarsuarmi amerlanerpaapput.
Niviaq Korneliussen atuakkiortunut nersornaasiunneqartartumik Nunanit avannarlernit nersornaaserneqarnermi kingorna oqalugiarami oqarpoq.
Ikiorneqarnissamik pisariaqartitsivit?
Imminnut toqunnissamik eqqarsaateqaraanni imaluunniit kisimiittutut misigisimagaani Tusaannga oqarasuaat 801180 imaluunniit sms 1899 attavigineqarsinnaavoq.
Oqaloqatiginninneq akeqanngilaq, kinaassutsimilli taasisoqartariaqarani.
Tusaanna pillugu annerusumik uani atuagaqarsinnaavutit.
Taassuma atuakkiani Naasuliardarpi nersornaaserneqassutigaa, nersornaat Naalakkersuisut siulittaasuannit, Múte B. Egedemit Københavnimi Skuespilhusimi tunniunneqarpoq.
AAMMA ATUARUK Korneliussen: Tusaaneqarneq ajortut tusarneqarnissaannut akisussaaffeqarpunga
Atuakkiortunut nersornaasiinermi nunatsinneersumik aatsaat siullerpaamik nersornaasiisoqarpoq, Niviaq Korneliussenillu aqqa nipituumik suaarutigineqarmat inuttaa attortisimasoq takuneqarsinnaavoq.
Inuusuttoq atuakkiortoq sekundialunnguit atorlugit eqqarsaqqaarpoq. Oqalugiarninilu isiginnaartunik tupaallaatigineqarluartoq aallartillugu.
Oqaluaataa assip kingorna atuarsinnaavat:
Nunatta siuttuinut oqalugiaatissannik allanniarsarigaluarpunga. Kisianni qarmarsuarmut oqaluussinerussaaq. Tamannalu naammatsiffigaara.
Taamaammat una atuakkiorninni allaaserisakka pillugit oqalugiarneraara. Nunatsinni meeqqat inuusuttullu. Ilissi pillusi nersornaaserneqarpunga.
Nunatsinni imminut toquttut nunarsuarmi amerlanerpaapput.
Kinguaariinni arlalinni amerlasuunik suli maaniissinnaagaluartunik, 20-nik, 15-inik aqqaneq-marlunnillu ukioqaliinnaratik sivisuumik inuuneqarsinnaagaluartunik annaasaqarnikuuvugut.
Pisariaqartitsinerpaaffissinni aaqqissuussaanitsinni sumiginnarneqartuarpusi. Akisussaaffitsik iperarlugu - ilissi akisussaaffilerneqarpusi, naak aqagussamut aniguisinnaanerlusi nalugissi.
Una ilissinnut ullormik inooqqinnissamut nukissaqalersunut oqalugiaataavoq, aqagumi ullup pitsaanerunissaa aqagulu immaqa isumagineqarsinnaanissarsi neriuutigaarsi.
AAMMA ATUARUK Niviaq Korneliussen Nunat Avannarliit Siunnersuisoqatigiivisa atuakkiortumut nersornaasiuttagaannik tunineqartoq
Ilissinnut, nakorsap, politiip, ilinniartitsisup, politikerip, upperiunnaagaannut.
Ilissinnut annilaangasunut, naammi inuunersi aatsaat aallartilaaraluartoq ikinngutisi tammararput.
Ilissinnut imminut toqoriaraluarneq pissutigalugu ilinniartunut ineqarfiinit anisitaasunut.
Ilissinnut pinnitsutut, atorsinnaanngitsutut nammaataaginnartutullu misigisimasunut.
Ilissinnut inoorusuttunut kisianni nukissaqarunnaartunut.
Aaqqissuussaanipalaatta inuunermik toqumillu aalajangiisariaqartippaasi.
Ilumoortuali tassaavoq, uagut inersimasut ilisseqanngippat suunavianngitta, ilissilu nunarsuarmiinnersi isumaqarnerpaavoq.
Inersimasut ilissinnut akisussaaffeqartut tamarmik sinnerlugit utoqqatserpunga, utoqqatserpunga immissinnut akisussaaffilerneqartuarassi. Ilissinnut annaasimasatsinnut oqaluuserisarunnaakkatsinnullu.
Imaassinnaavoq inuit sunniuteqarnerpaat pissaaneqarnerpaallu tunuinnarlutik allamut isigalutik tamatuma nammineq qaangiunnissaa neriuutigigaat.
AAMMA ATUARUK Korneliussen Statens Kunstfondimit eqqumiitsuliornermut tapiisutinik 855.000 koruuninik taperneqartoq
Sulili maaniippusi, amerlasoorujussuuvugullu ilissinnik naleqartitsillutillu upperinnittut.
Taamaammat inuusuttut aqqutinni naapissimasakka tamassinnut qujanaq. Qujanaq taama asannitsigigassi, taama pikkoritsigigassi, taama kusanartigigassi. Qujanaq uannut tatiginnikkassi. Tunissutaavoq ataqqinarnerpaatut pigisara taamaattussaannartullu isigilinngisaannassavara. Pisinnaasara tamaat atorlugu ilissi pillusi oqaaseqartarlungalu maaniissaanga.
Qujanaq, tunniutiinnannginnassi qujanarlu pinngorsimagassi. Ilissi pillusi una nersornaasiutaavoq.
