Niviaq Korneliussen Nunat Avannarliit Siunnersuisoqatigiivisa atuakkiortumut nersornaasiuttagaannik tunineqartoq

Oqaluttuarisaanermi pingaarutilimmik marlunngornermi unnukkut pisoqarpoq.

Kalaalermi Nunat Avannarliit Siunnersuisoqatigiivisa atuakkiortumut nersornaasiuttagaannik siullerpaamik nersornaaserneqarpoq.

Kalaallimmi atuakkiortup Niviaq Korneliussenip atuakkiani "Naasuliardarpi" nersorneqaatigaa. Kalaallit inuusuttut imminut toquttarnerat atuakkiami sammineqarpoq.

Atuakkiortumut nersornaasiuttagaq naalakkersuisut siulittaasuannit Múte B. Egedemit, Savalimmiullu naalakkersuisuisa siulittaasuannit Bárður á Steig Nielsenimit tunniunneqarpoq. Nersornaasiineq Københavnimi Skuespilhusetimit toqqaannartumik aallakaatinneqarpoq.

Nersornaasiieq uani isiginnaarneqarsinnaavoq.

Kalaallit meerartaannut inuusuttortaannullu nersornaasiineq

Niviaq Korneliussenip nersornaaserneqarnini attortissutigaa.

Oqalugiaramilu nersornaat kalaallit meerartaannut inuusuttortaannullu tunngatippaa:

- Nunamma aqutsisuinut oqalugiarnissara pillugu allagaqaateqarpunga, kisianni allaanngilaq tusaaniarneqanngitsunga. Kisianni tamanna qaangerpara. Oqalugiarneralu allaaserisannut saatsikkusuppara. Meeqqanut inuusuttunullu nunanni. Ilissimi pissutaallusi nersornaammik massuminnga tunineqarpunga, Niviaq Korneliussen oqalugiarami ilaatigut oqarpoq.

- Ilissi pillusi sapinngisara tamaat sukataarniarpunga. Ilissi sinnerlusi sulissaanga. Inuunerup taarnerpaaffiani nukittullusi qaangiilluartarnissinnut qujanaq. Nersornaat una ilissinnut pigitikkusuppara, Niviaq Korneliussen oqarpoq.

Niviaq Korneliussen kisimi attortinngilaq. Isiginnaartummi akornanni amerlasuut Niviaq Korneliussenip oqalugiaataanit attortittut tv-kkut aallakaatinneqartukkut takuneqarsinnaavoq.