Nivi Olsenimut toqutsinissamik sioorasaarineq pillugu eqqartuussivimmi suliassaq kinguartinneqartoq
Maajip qaammataani silap allanngorarnera Demokraatit siulittaasorigallagaanut, Nivi Olsenimut toqutsinissamik sioorasaaruteqarsimaneq pillugu eqqartuussinissap kinguartinneqarneranik kinguneqarpoq.
Eqqartuussisoqarfik Qeqqa taama paasissutissiivoq, Nivi Olsenillu tamanna uppernarsarpaa.
- Uggornartorujussuuvoq. Eqqartuussivimmi suliap naammassinissaanut qilanaaraluarpunga, maannali suli utaqqeqqissarpasippunga, Nivi Olsen KNR-imut oqarpoq.
AAMMA ATUARUK Demokraatit siulittaasuat eqqartuussivimmiissasoq: Toqumik sioorasaarneqarpunga
Eqqartuussineq sapaatip-akunnerani matumani marlunngornermi aallartittussaagaluarpoq, eqqartuussissuserinermili illersorti Maniitsumut eqqartuussiffiusussamut sila ajormat tikissinnaanngilaq.
Nivi Olsenip eqqartuussivimmut nassuiaateqariartornissani KNR-imut sapaatit akunnerata siuliani oqaluttuaraa. Suliaq politikerip ukiup affaata matuma siorna toqunneqarnissamik sioorasaarneqarsimaneraragaaneranut tunngavoq.
Eqqartuussivimmi suliap aallartinissaanut nutaamik suli ulluliisoqanngilaq, Eqqartuussisoqarfik Qeqqatali Maniitsumi immikkoortortaqarfia naapertorlugu suliap aallartinnissaanut ullulerniarnissaanut qaammatit qassiusut ingerlasinnaapput.
- Sioorasaaruteqarnerit kingunerisaanik politikkikkut suliaqarnera unissanngilaq. Taamaammat piffissami kingusinnerusumi ulluliisoqarnera pillugu sianerfigineqarnissara naatsorsuutigaara, Nivi Olsen oqarpoq.
