Nivi Heilmann Efraimsen: Atuanngiffeqartarnerit kulturitsinnut tulluarsarnerunissaat piffissanngorpoq

Meeqqat atuarfimmit juunip qeqqata missaaniit augustip aallartinnerata tungaanut aasaanerani atuanngiffeqartarnerat ukiorpassuarni nalinginnaasuuvoq.

Tamannali allanngortinniarneqarpoq. Qallunaat ileqqui malikkunnaarlugit ileqqulugu malillugit meeqqat atuarfiini atuanngiffiit tulluarsarniarneqarput.

- Qallunaat europamiut ukiuni amerlasuuni maliniarlugit ingerlanikuuvugut. Taannalu iluatsippiarneq ajorpoq.

- Pissutigalugu naleqartitagut kinaassuserput aallaavigineq ajoratsigu. Tassa uanga piffissanngorsorivara aallaavigalugu atuarnernik aaqqissuussinnaasagut annikitsukkuutaarlugit alloriarfigillattaassagigut, Qeqqata Kommuniani kommunalbestyrelsimi ilaasortaq Nivi Heilmann Efraimsen (IA) oqarpoq.

AAMMA ATUARUK Meeqqeriviit sapaatip akunnerata naanerani ammasarnissaanut siunnersuut itigartinneqartoq

Eqalunniarnerit, kapisilinniarnerit, aavarnerit, umimmanniarnerit allallu aasaanerani pisarput. Takkulu pineranni meeqqat atuanngiffeqartariaqartut, siunnersuuteqartoq isumaqarpoq.

- Junip naanerani atuarunnaassapput, augustillu naalernerani atualeqqillutik, Nivi Heilmann Efraimsen KNR-imut oqarpoq.

Nivi Heilmann Efraimsenip Qeqqata Kommuniani meeqqat atuarfiini aasaanerani atuanngiffeqartarnerit kulturitsinnut inooriaasitsinnullu tulluarsarneqartariarsorigamigit siunnersuuteqarpoq.

- Inuusaaserput kalaaliunerput, naleqartitagut malillugit atuarfipput aaqqissuunniarutsigu aallartiffeqartariaqarpugut, Nivi Heilmann Efraimsen oqarpoq.

AAMMA ATUARUK Kommunimut qinersineq: Qeqqata Kommunimi Inuit Ataqatigiit piumasaat

Juulimi aggustusimilu innuttaasut amerlanerpaartai sulinngiffeqarlutik aalisariarlutillu piniariartartut siunnersuuteqartoq oqarpoq.

- Aamma nalunngilarput piniartuinnaanngitsut sulisartut angajoqqaat sulinngiffeqartartut amerlasoorujussuusarput julimi augustimilu, Nivi Heilmann Efraimsen oqarpoq.

Meeqqat juunip qeqqata missaani atuanngiffeqaleraangamik angajoqqaat sulisartut, meeqqallu amerlasuut angerlarsimaffimmi kisimiittariaqartartut Nivi Heilmann Efraimsenip ilisimavaa.

- Taava meeraq tassani aamma kisimiittorujussuunginnissaa isiginiarpara, Nivi Heilmann Efraimsen oqarpoq.

Qeqqata Kommuniani kommunalbestyrelsi sisamanngornermi, tassa septembarip ulluisa 30-ani ataatsimiissaaq tassanilu meeqqat atuarfiini aasanerani atuanngiffeqartarnermut allannguutissatut siunnersuut oqaluuserineqassaaq.

KNR.gl-imi isummersorfik teknikkikkut ajutooqqavoq. Ajoqutaa misissorparput.