Meeqqeriviit sapaatip akunnerata naanerani ammasarnissaanut siunnersuut itigartinneqartoq
![](/sites/default/files/styles/image_934x467/public/article_images/img_6647.jpg?itok=cOxTluJr)
Qeqqata Kommuniani meeqqerivimmik sapaatit akunnerisa naaneranni ammasoqartalernissaa, kommunalbestyrelsimi ilaasortap, Naleqqameersup, Karl Lyberthip siunnersuutigaa.
Tamatumanili isumaqatigineqanngilaq. Qeqqata Kommuniani kommunalbestyrelsit tamanna pisariaqartinneqanngitsoq nalilerpaat.
Siunnersuut taanna kommunalbestyrelsimi ippassaq ataatsimiinnermi sammineqarpoq.
- Tassa una uggornaqutigivaa kommunalbestyrelsimi amerlanerussuteqartut Siumut, Inuit Ataqatigiit Atassullu itigartiivillugu itigartikkamikku ataatsimiititaliamulluunniit ingerlatinnissaa taanna itigartikkamikku. Kissaatigigaluarakku ataatsimiititaliamulluunniit ingerlanneqassasoq. Taava tassani misissorluarneqarluni qanoq annertutigisumik pisariaqartitsisoqarnersoq, Karl Lyberth oqarpoq.
IA: Itigartitsissutigaarput
Taassuma oqarnera naapertorlugu Naleraq suliffeqarfinnit arlalinnit angajoqqaat meeqqaminnik paarsisariaqarnerat pissutigalugu sapaatip akunnerata naanerani sulisussaaleqisarnerminnik ajornartorsiuteqartunit saaffigineqarsimapput.
Tamanna Inuit Ataqatigiinnit Nivi Efraimsenip itigartitsissutigaa. Taassuma oqarnera naapertorlugu meeqqeriviit sapaatip akunnerata naanerani ammasariaqarnissaannut pisariaqartitsisoqarneranik paasisaqarsimanngillat.
- Saaffiginnissutinik ataasinnguamilluunniit tigusaqarnikuunnginnatta. Taamaattumik itigartitsilluta, taanna oqarpoq.
Tunniutiinnanngitsoq
Karl Lyberthili suli tunniutiinnanngilaq.
- Eqqarsarpunga suliffeqarfiit assigiinngitsut alakkaqqilaarniarlugit aamma Royal Greenlandi aamma alakkaqqilaarniarlugu allallu. Taava taakkua oqaloqatigereerukkit neriuppunga allagaqassasut kommunimut kissaateqarlutik.
Naleraq kommunimut qinikkanit 15-init sisamanik qinigaatitaqarpoq.
Kommunimi Siumumeersoq, Malik Berthelsen borgmesteriuvoq.