Nina Kreutzmann Gazamut 20.000 koruuninik katersisoq: Iliuusissaaleqivunga

Nina Kreutzmannip Gazami pissutsit sakkortulluinnartutut nassuiaatigai, taamaammat eqqugaasunut katersuiniarnermik aallartitsivoq.

Allattoq Hanna Vestergaard Hviid

novembarip 22-at 2023 08:00

Nutserisoq Connie Fontain, Hanne Petersen

Meeqqat uutitersimasut, meeqqat toqungajalersut angajoqqaallu meeeqqaminnik annaasaqaqqammersut assingi videoliallu.

Nina Kreutzmannip Hamasip Israelillu akersuunnerat oktobarip arfineq-aappaannili aallartittoq, Gazastribenimilu naalakkersuisut naapertorlugit meeqqat 5500-init amerlanerusut toqunerannik kinguneqartoq pillugu nutaarsiassanik ujartuigaangami tamakku takusarpai.

Tamanna pissutigalugu erinarsortartoq, Nina Kreutzmann iliuuseqarpoq.

- Gazami pisut sakkortulluinnarput. Nunanimi allani soorlu tappavani Gazami pisut assigiinngitsut ullutsinni nittartakkatigut toqqaannartumik allaat malinnaavigisinnaanngornikuuagut, taanna oqarpoq, nangillunilu:

- Qanorli iliuuseqarfigisinnaanngilakka. Taamaammat qanoq iliorsinnaanerlunga eqqarsalerpunga. Allatullu iliorsinnaannginnama tappavani sorsuffiusumi eqqugaasunik ikiuinermik suliallit aningaasanik massakkorpiaq katersuiniutiinnarsinnaavakka.

PISUT NAATSUMIK

Oktobarip arfineq-aappaani Hamasip sakkutuui Israelip Gazallu killeqarfiatigut saassussivoq, Israelillu oqarnera naapertorlugu inuit 1200-it amerlanerpaat inuinnaat toqutaapput.

Israelip saassussinermi akissuteqarnerani palæstinamiut ikinnerpaamik 13.000-it toqutaasut peqqinnissamut ministereqarfiup, Hamasimit aqunneqartup oqaatigaa. Taakkunani 5500-init amerlanerusut meeraapput.

Saassussinerit israelimiut palæstinamiullu ukiuni qulikkuutaani kina nunami pisussaaffeqarnersoq pissutigalugu aaqqiagiinngissuteqarnerisa kinguneraat.

Aaqqiagiinngissuteqarneq nunarsuarmi sivisunerpaamik aaqqiagiinngissutigineqartut ilagaat.

Gazami Danmarkimi Langelanditulli isorartutigisumi inuit 2 millionit missaanniittut najugaqarput. Taakku 40 procentii 15-it ataallugit ukioqarput.

Peqqarniisaarniap Hamasip Gaza 2007-imi aqulerpaa. Israelilli Gazap killeqarfii, Gazap imartaa Gazallu silaannaa aqutaralugu.

Israel Hamasip saassussineranut akissuteqarluni Gaza mattulluinnarpaa, tassa nerisassat ikummatissallu palæstinamioqarfimmut eqqunneqarsinnaajunnaartivillugu. Aamma innaallagiaqarneq imerlu aamma qamippai.

Allisiguk

Nina Kreutzmann Røde Korsip nittartagaa aqqutigalugu nammineq katersuiniarnermik aallartippoq, aningaasallu taakku Røde Korsip Gazami ikiuiniarnermi suliaqarnerani atorneqassapput.

20.000 koruunit katersorneqareerput, naak katersuiniarneq suli qaammatini marlunni ingerlasussaagaluartoq.

- Katersuiniarninni anguniakkat 100.000 koruuniusut allassimannginnakku ugguutigaara. Tassanngaannaqisumilli katersuiniarlunga aallartippunga, katersuiniarninnilu angorusutakka 20.000 koruuniupput, taakkualu piffissap sivikitsup iluani katersorpakka, Nina Kreutzmann oqarpoq.

Inuit pisinnaagunik suli tunniussaqarnissaannik kaammattuuteqarpoq.

Iliuusissaaruttut misigineq

Nina Kreutzmann peroriartornermini radioaviisi ullut tamaasa tusarnaartarpaa, tamanna pissutigalugu nunarsuarmi susoqarneranut malinnaasarluni. Ajunngitsut ajortullu. Taassumalu pisut isorniartumik apeqqusertassallugit angajoqqaaminit ilikkarnikuuaa.

Tamannalu pisumi uani taama iliuuseqarnissaanut kajumisitsivoq. Taannami aatsaat siullermeerluni katersuinianngilaq. Taannami qimarnguttoqarnerani 2015-imi aamma siorna Ukraineimi sorsunnerup aallartinnerani katersuiniarnikuuvoq.

Assigiinngitsorpassuarnut ikiuiniartarpunga, Gazamulli ilungersuaffioqisumut massakkorpiaq ikiuiniarpunga.

Aamma atuarukHamasimi siuttoq: Israelilu Gazami sakkuaakkunnaarallarnissamik isumaqatigiissusiornissarput qanilliartorpoq

Taamaammallu pisut qanimut aamma malinnaavigai, aamma naak assit takusani sakkortusinnaagaluartut.

- Sooq taama pisoqarnersoq paasiniarlugu tappavani pisut malinnaaffigaakka. Taamaalioraangamalu alianaqisut ajoraluartumik arajutsisassaanngivittarput, Nina Kreutzmann oqarpoq, nangillunilu:

- Soorunami qanoq iliuusissaaleqivunga. Inuimmi meeqqanik piartortunik toqusunillumi isigisallit amerlanerpaartaat taama misigissagunavipput.

Ilungersunarluinnartoq

Gazami pisut inuit ikiorneqarnissamik pisariaqartitsiffiattut oqaatigineqarpoq. Imermik nerisassanillu pisariaqartitsigasuartoqarpoq.

Nina Kreutzmann apersorneqanngitsiarnermini Dansk Røde Korsimit nalunaarutisivoq, tassani Gazami ambulanceminnik annaasaqarlutik allassimavoq.

- Tappavani sorsuffiuleruttortumi toqutaasut ikiuinermik suliaqartortaqarnerat assuarnaqaaq.

Aamma atuarukNaalungiarsuit 31-it Gazami napparsimmavimmit ambulancenit qimagussuuneqarput

Nina Kreutzmannip pisut suli attortissutigingaatsiartarpai, naak katersuiniarnikkut Gazami eqqugaasunut ikiuiniaraluarluni.

- Sorsuffiusumiilluni qanoq misigisimanarnersoq takorlooruminaatsipparput. Nunarpummi sorsussimanngisaannarpoq. Taamaammat qanoq iliuusissaaleqinaqalunilu erloqinaqaaq.

Nina Kreutzmann iliuusissaaleqisut misigiffigisamini ataatsimik apeqqutissaqarpoq: naalakkersuisut Gazami akersuuttoqarnera qanoq oqaasissaqarfigaat?

- Naalakkersuisuvut tappavani pisut pillugit oqaaseqaqqunaraluaqaat, nalunngilaralu tamatumani isumaqatiginnitserpassuaqarlunga.

Nina Kreutzmannip katersuiniarneranut februaarip aallaqqaataata tungaanut tunniussaqartoqarsinnaavoq.