Hamasimi siuttoq: Israelilu Gazami sakkuaakkunnaarallarnissamik isumaqatigiissusiornissarput qanilliartorpoq
![](/sites/default/files/styles/image_934x467/public/2023-11/20230622-114317-6-2500x1667ma.jpg?itok=whgOrjqS)
Israelip Hamasillu akornanni sakkuaakkunnaarallarnissamik isumaqatigiissusiornissaq qanilliartortoq, palæstiinamiut sakkuaakkumatuui Hamasimeersut ataasinngornermi marlunngornerullu akornanni unnuakkut oqaatigaat.
Hamasip politikkikkut siuttua Ismail Haniyeh taama oqarpoq.
Hamasip akissutini atorfilittanut Qatarimiittunut tunniuteqqammersimagaat, taassuma oqaatigaa. Hamasip siuttuisa akornanni amerlasuut Qatarimi najugaqarput. Qatar Israelip Hamasillu isumaqatigiinniarneranni isumaqatigiissitsiniartuusimavoq.
Isumaqatigiissusiortoqarsimanersoq, Israelimit Hamasimiilluunniit suli uppernarsarneqanngilaq.
Sakkuaannerit qanoq sivisutigisumik unitsikkallarneqassanersut, Haniyehp oqaatiginngilaa.
Sakkuaannerni tigusarineqarsimasunik paarlaasseqatigiittoqassanersoq aamma oqaatigineqanngilaq.
Gazami inuit 13.000-nit amerlanerusut, Israelip Hamasillu sorsunneranni maannamut toqutaasimasut, Gazami peqqinnissaqarfiup, Hamasimit aqunneqartup, nalunaarutigaa.