NIISIP Inuit innarluutillit illersuisuata isornartorsiuinera ilaleraa

Kommunillu innarluutilinnut pitsaanerusumik sullissilissappata aaqqiivigisassat ikinngitsut, peqatigiiffiup siulittaasua Ida Abelsen-Hansen isumaqarpoq.

- Sullitat pitsaanerusumik atugassaqartinneqassappata kommunit iluminni namminneq anguniagassalersortariaqarput innarluutilinnut tunaartaqartumik suliniuteqarnissaminnut, Ida Abelsen-Hansen oqarpoq.

Kommunini sulisunik amigaateqarneq kommuninilu sullissisut pisariaqartumik ilinniagaqanngitsut inuit innarluutillit illersuisuata ilaatigut isornartorsiorpai.

AAMMA ATUARUK Innarluutillit pillugit oqallinnermut kommunit peqataasariaqarput

AAMMA ATUARUK 'Innarluutilinnut illersuisut isornartorsiuinera assortoruminaapput'

Isumaginninnermilumi siunnersortit ikippallaartartut, NIISIP-ip siulittaasuata oqaatigaa.

Tassami maanna sullissisuusut suliassartik pitsaasumik naammassisinnaanngimmassuk:

 - Suliaat amerlavallaarneri peqqutaallutik ilaatigut suliaminni pitsaasumik angusaqanngitsoorsinnaasarput. Suliaat annikinneruleraluarpata angusassaat annertunerusinnaassagamik.

Aamma sulisut ataavartumik pikkorissartuartariaqarnerannik taanna ujartuivoq.

- Aalajangersimasumik ataavartumik piusinnaasumik pikkorissarfissanik periarfissiigaluarunik taamaasillutik tunngaviusumik sulisut pikkorissaqataasinnaanermikkut pitsaanerusumik sullitaminnut angusaqarsinnaapput. Namminnerlu suleriusissaminnik pitsaanerusumik angusaqarsinnaallutik, Ida Abelsen-Hansen oqarpoq.

AAMMA ATUARUK Innarluutillit illersuisuata isornartorsiuinera kommuninit isumaqatigineqanngilaq

AAMMA ATUARUK Innarluutillit illersuisuata suliaqarnissaminut isumalluutit amerlanerit ujartorai

Innarluutilinnik sullissinerup pitsanngorsaavigineqarsinnaanera Kommune Kujallermi Isumaginninnermut ataatsimiititaliami siulittaasup nassuerutigaa. Sorpiaalli pitsanngorsaavigineqassanersut maanna misissortikkitik oqarpoq.

- Najugaqartitseriaatsigut ulluuneranilu neqeroorutigisartakkatta maannakkut killiffii aallaavigalugit suunukua pitsaanerusumik ingerlanneqalersinnaasut. Taava taakku novembarimi missingersuusiulinnginnitsinni neriuutigivarput naammassineqareersimassasut, Kommune Kujallermi isumaginninnermut ataatsimiititaliami siulittaasoq Karla E. Bisgaard oqarpoq.