Innarluutillit illersuisuat: Innarluutillit pillugit oqallinnermut kommunit peqataasariaqarput
Innarluutillit sullinneqarnerinut oqartussaaffik kommuninit 2011-mi tiguneqarmalli innarluutillit atugaat ajorsigaluttuinnarput. 2014-imi nalunaarusiami ilaatigut tamanna allassimavoq. Kommunini sulisunik amigaateqarneq, aningaasanik aqutsineq tusiapittoq, kommuninilu sullissisut pisariaqartumik ilinniagaqanngitsut nalunaarusiami erseqqissaatigineqarpoq.
Innarluutillit innarluutilinnut illersuisumut, Christina Johnsenimut sianeraangamik ajornartorsiutit tamakku aamma oqaatigisarpaat, taamaammat innarluutilinnut ukioq manna sapaatip akunneqartitsinerup aallartinnerani oqalugiaammini kommunit suliamik suliarinnissinnaanerat apeqquserpaa kommunillu oqalliseqataanissaannik kaammattorlugit.
- Innuttaasunut innarluutilinnut qanoq pitsaanerpaamik iliuuseqarnissatsinnut oqallinneq ajornakusuulaartoq aallartissagipput kissaatigaara.
AAMMA ATUARUK Innarluutilinnik sullissineq kommuninit akisussaaffigineqalissaaq
'Aningaasanik tunniussiinnarneq-ajorpugut'
Christina Johnsen innuttaasut innarluutillit kommunimit eqqunngitsumik sullinneqarnertik pillugu saaffiginnittartut pillugit arlalinnik assersuutissaqarpoq. Assersuutigalugu innuttaasoq ataaseq scooteriminik innaallagiatortumik ullormut innaallagialersuinissamut tapiissutisisarnissamik qinnuteqaamminik itigartinneqarsimavoq. Tapiissutit siusinnerusukkut tunniunneqartarsimagaluarput.
- Innuttaasullu akissutissarsiaa tassaavoq aningaasanik tunniussuiinnarneq ajorpugut.
Christina Johnsen naapertorlugu taamatut pisoqarnera kisiartaanngilaq.
- Aningaasassaqannginneq innuttaasunillu pasinarsaaneq tusarajupparput.
AAMMA ATUARUK Innarluutillit sullinneqarnerisa kommuninut nuunnissaat assigiinngitsumik isummerfigineqarpoq
Christina Johnsenilli aningaasassaaleqineq pissutituaasorinngilaa. Sulialli ingerlanneqarnerat pitsaanerusariaqarsoralugu.
- Suliat suliarineqarneri sivisoorujussuusartoq tusarajupparput. Taava eqqarsarpunga sulinerit pitsaanerusumik eqqarsarluarnerusumillu ingerlanneqarsinnaannginnersut.
Christina Johnsenip ammaanersiornermi oqalugiarnermini nunatsinni kommunit akornanni nalingiinngiiaartoqarnera aamma erseqqissaatigaa. Christina Johnsen naapertorlugu Nuummit ungasinneruleriartornermi innuttaasuuneq sulisutullu pisariaqartunik ilinniagaqarnissaq ajornarneruleriartortarpoq. Innarluutilinnut sapaatip akunneqartitsineq ullumi aallartinneqartoq sapaatip akunnera tamaat malunnartinneqassaaq.
AAMMA ATUARUK Innarluutilinnut qitornaasut sapaatit akunneqartitsinermi immikkut sammineqartut
