Innarluutillit sullinneqarnerisa kommuninut nuunnissaat assigiinngitsumik isummerfigineqarpoq

Innarluutillit sullinneqarnerisa Julip aallaqqaataani kommunenut nuunneqarnissaa atuisunit assigiinngitsunik qisuariarfigineqarpoq.
apriilip 22-at 2010 17:34

Poul Erik Christensen-ip Sisimiuni najugallip pania, innarluuteqalerneraniit ukiup ataatsip affaalu qaangiuppoq.

Taanna isumaqarpoq Kommunet piareersimanngilluinnartut.

-Nilliajuanngikkaanni angusaqalaarneq ajornaqaaq, killuulluta uagut kommune oqaluttuutariaqartarsimavarput inatsisit qanoq isumaqarnersut, innarluutillillu qanoq piginnaatitaaffeqarnersut.

Naak tamanna killormoortussaagaluartoq.

Tamannarpiarli pinngitsoorniarlugu piareersarnerit ingerlaleruttorput. Isumaginninnermi naalakkersuisoqarfimmi innarluutilinnut immikkoortoqarfimmi pisortaq Naja Rosing Fleischer oqarpoq.

-Tassa massakkut tunniussinissamut piareersarpugut, taamaaammat aamma maajimi pilersaarutaavoq innarluutilinnut sullissisut sagsbehandlerit kommuneni sulisut maani nuummi pikkorissarneqarnissaat tassani ulluinnarni maani innarluuteqarnermik immikkoortoqarfimmi suliaasut kommunenut tunniunneqarnissaannut piareersaatitut pikkorissaassutigineqassapput.

Naja Rosing Fleischer oqarpoq. Namminersornerusuni innarluutilinnut siunnersortit kommunet sullissinermi tigusereernerata ukiup affaa qaangiunnissaannut saaffiginerqarsinnaasussaapput.

Poul Petersen Qaqortumi innarluutilimmut ataataasoq toqqaannartumik kommunemut saaffiginnissinnaalernissani iluaallassangatippaa.

-Maannamut pissutsit imaannerusarami angajoqqaatut saaffigissagaangatta arlaannik allagaqarlutaluunniit Nuummut allagaqartariqartaratta ilaatigullu immaqa apuuffissavianut apuunnersut ilisimasarnatigit, maani kommunet iluani sullinneqalerpata immaqa periarfiassaq ajornannginnerulersinnaasooq saaffissat qaninnerulertut isikkoqalissammata.

Kanukokap Naattorsuutiginngilaa innarluutilinnik sullissinerup nuunneqarnera ajornartorsiutinik aaqqinneqarsinnaanngitsunik pilersitsiumaartoq.