Innarluutilinnut qitornaasut sapaatit akunneqartitsinermi immikkut sammineqartut

Ukioq mannalu sapaatit akunneqartitsinermi immikkut sammisassaq tassaavoq "Inummut timikkut/tarnikkullu innarluutilimmut meeraaneq".

Isumaginninnermut naalakkersuisoq tusagassiorfinnut nalunaarummi taama allappoq.

Inunnut innarluutilinnut suliassaqarfimmi tapersersorneqarnissamut neqeroorutit suliniutillu tamanut samminissaasa tamatigoortuunissaasalu pisariaqartinneqarnerat sammisami erseqqissarneqarpoq

- Pineqartoq ilaqutariinnut ilaavoq, - innarluutigineqartorlu ilaqutariinni tamanut sunniuteqarpoq. Ilaqutaasut isiginiarnerulissagivut suliniutillu angusaqarfiunissaat ilaqutariinnullu tamanut tunngaveqarnissaat qulakkiissagivut Naalakkersuisut kissaatigaat. Tamanna pingaartumik meeqqanut inunnik innarluutilinnik angajoqqaaqarlutik peroriartortunut atuuppoq, Doris J. Jensen taama allappoq.

- Meeqqammi taakku arajutsineqakkajuttarput maannakkuugallartorlu meeqqanut neqeroorutigisartakkavut ikittuinnaapput, taama erseqqissaavoq.

Aaqqissuussinissamut tapiisoqarsinnaasoq

Inunnut innarluutilinnut sapaatip akunneqartitsinermi sammineqartumut attuumassuteqartunik suliniuteqarnissanut aaqqissuinissanullu Isumaginninnermut Aqutsisoqarfimmut taperneqarnissamik qinnuteqarsinnaaneq periarfissaavoq.

Qinnuteqaat Isumaginninnermut Aqutsisoqarfimmit kingusinnerpaamik 5. oktober 2018-imi tiguneqareersimassaaq.

Qinnuteqaat Isumaginninnermut Aqutsisoqarfimmut mailikkut iass@nanoq.gl-imut imaluunniit allakkatigut Isumaginninnermut Aqutsisoqarfimmut, Postboks 260, 3900 Nuummut "SAPAATIP AKUNNERA 41"-mik nalunaaqutserlugu nassiunneqassaaq