Innarluutillit illersuisuata suliaqarnissaminut isumalluutit amerlanerit ujartorai
Taassuma utoqqaat illersuisuulersussaata sulinermini atortussanik amigaateqaratarsinnaanera ernummatigaa. Namminermi amigaatigai.
Innarluutillit illersuisuat innarluutillit pisinnaatitaaffiinik inuiaqatigiinnilu innarluutilinnut soqutiginnittoqarnerulersitsiniarnissamik kiisalu innarluutillit qanoq atugaqarnerannik maluginiagaqartitsinermik suliaqartussaq, Naalakkersuisut 2017-imi pilersippaat. Innarluutilinnulli illersuisunngortoq Christina Johnsen naapertorlugu suliamut nassuiaammut atortussat ilaanngillat.
- Inatsisitsinni suliassarpassuaqalerpugut, suliassat ajunngitsorujussuupput silatusaarnerullutillu, kisianni ilungersoqaagut.
AAMMA ATUARUK Handicaptalsmandsinstitution har fået navn
Christina Johnsen naapertorlugu kommunini tamani innuttaasut orninniarnerannut atortussat amigaataanerat ajornartorsiutaavoq. Aammattaaq innuttaasut sullilluarneqannginnerminnik naammagittaalliuteqaraangata, kommunit iluamik ilumut sulinersut misissussallugu ajornakusoortorujussuuvoq.
- Taava aamma paaqqinniffinni pissutsit ajorluinnarnerarlugit alakkartariaqarigut saaffigineqaqattaartarpugut. Akissaqannginnattali taaamaaliornissarput ajornalaartorujussuuvoq.
Innarluutillit illersuisuata ilisimasanik katersinissaq aamma suliassarigaa, Christina Johnsenip oqaatigaa. Tamatumunngali aamma akissaqanngilaq.
-Ajornaluartumik akissaqannginnerput peqqutigalugu angalanermi nalunaarusiorsinnaannginnatta itinerusumilluunniit misissuisinnaannginnatta. Tamanna uannut unammillernarpoq.
Utoqqaat illersuisuat isumalluutissaqartariaqartoq
Christian Johnsenip inuiaqatigiinni sanngiinnerusortanut illersuisuunini pingaartuusoraa, taamaammallu naalakkersuisooqatigiilersut utoqqaat illersuisoqalernissaannut suliniutaat nuannaarutigalugu. Taamaakkaluartorli atuuffiup taassuma pisariaqartunik aamma akissaaserneqannginnissaa ernumanartoqartippaa.
AAMMA ATUARUK Suliffeqarnermi ilanngaat, mittarfissualiassat utoqqaallu illersuisuat
- Utoqqaat illersuisoqalersinneqarnissaannut isuma kusanarlunilu nuannerpoq. Tamannali akeqarpoq. Iluarsiigallaatitut aaqqiissutaaginnassanngilaq. Nangaassuteqartoqaranilu piumassuseqarfigineqarluassaaq, Christina Johnsen oqarpoq.
Sapaatit akunnerat tulleq ukioq manna innarluutillit sapaatip akunnerisussaavaat tassanilu innarluutillit qitornai sammineqassapput. Sapaatip akunnerani tassani nunatsinni innarluutilinnut tamanut sammisassaqartitsisoqassaaq.
AAMMA ATUARUK Innarluutilinnut qitornaasut sapaatit akunneqartitsinermi immikkut sammineqartut
