Politikki

Naalakkersuisooqatigiinnissamut isumaqatigiissut: Suliffeqarnermi ilanngaat, mittarfissualiassat utoqqaallu illersuisuat

Aalisarnermut inatsisissaq, mittarfissuit utoqqaallu illersuisussaat. Tamakku naalakkersuisoqatigiit nutaat Siumut, Nunatta Qitornai Atassutillu suliarisassaata ilaapput.

Allattoq Paninnguaq Steenholdt

oktobarip 03-at 2018 06:07

Nunatsinni ineriartorneq nukittuumik inissisimaleqqullugu naalakkersuisoqatigiit nutaat suliniarput. Tassani sumi inunngorsimaneq, suiaassuseq upperisarlu apeqqutaatinneqassanngitsut, isumaqatigiissummi marlunngornermi ualigaa saqqummiunneqartumi atuarneqarsinnaavoq.

Naalakkersuisooqatigiit suliassaasa ilagaat Ilulissani, Nuummi Qaqortumilu mittarfissualiornissaq. Kangerlussuup Narsarsuullu siunissaat pillugit kommunit peqatigalugit aalajangiisoqassasoq, tassungalu atatillugu namminersorlutik inuussutissarsiuteqartut suleqataasinnaanerat ammaffigineqassasoq, isumaqatigiissummi atuarneqarsinnaavoq.

AAMMA ATUARUK Naalakkersuisooqatigiilersut Demokraatillu mittarfiit pillugit atsioqatigiissuteqartut

Aalisarnermut inatsisissaq

Isumaqatigiissummi immikkoortoq pingaartoq alla tassaavoq aalisarnermut inatsisissaq. Aalisarneq pillugu inatisissaq ataatsimiititaliarsuarmut suliassanngortinneqartoq, tusagassiortunik marlungornermi katersortitsinermi saqqummiunneqarpoq.

AAMMA ATUARUK Tatiginnikkunnaarnermik taasititsisoqarsinnaanera Kim Kielsenip ernumanartoqartinngikkaa

Aalisarnerullu ineriartortittuarnissaa naleqqussartuarnissaalu pisariaqartoq, tassanilu naalakkersuisooqatigiit susassaqartullu suleqatigiilluarnissaat pingaaruteqartoq, isumaqatigiissummi ilaatigut atuarneqarsinnaavoq.

Inuusuttut aalisartut periarfissaat pitsaanerulersinniarlugit sinaakkusersorluarneratigut, nunatsinnilu aalisagartassiissutigineqartut tamakkerlugit qaqinneqartarnissaat anguniarneratigut aalisarneq pitsanngorsaaffigineqassaaq. Taamatullu aalisarnermik piniarnermillu inuussutissarsiutigalugu allagartaqartarneq nutarterneqassaaq.

Utoqqaat atuagarisaat

Utoqqaat atugarisaat aamma isumaqatigiissummi ilanngunneqarput, tassani utoqqaat illersuisuannik pilersitsinissaq sulissutigineqassasoq atuarneqarsinnaavoq.

Atuartitaanikkut ilinniartitaanikkullu aaqqissuusseqqittoqassasoq, innarluutillit pillugit inatsissaq naammassineqassasoq ineqarnikkullu aaqqissuusseqqinneq suliarineqassasoq, naalakkersuisooqatigiit isumaqatigiissutaanni aamma atuarneqarsinnaapput.
Taamatullu suliffeqarnermi ilanngaat 2020-imiit aallartittumik eqqunneqassasoq naalakkersuisooqatigiit nutaat anguniagaasa ilagaat.

Isumaqatigiissut tamaat uani atuaruk.

AAMMA ATUARUK Kielsenip naalakkersuisooqatigiivi nutaat aajuku