Innarluutillit illersuisuata isornartorsiuinera kommuninit isumaqatigineqanngilaq
Kommunit sullissineranni akiniaasaartoqartarnera, sulisorineqartut ilinniarluarsimannginnerat sulianullu naleqqutinngitsumik tunngavilersuisoqartarnera. Kommunit innuttaasunik innarluutilinnik sullissinerat naammaginanngilaq, inunnut innarluutilinnut illersuisoq, Christina Johnsen, taama isumaqarpoq. Kommuneqarfik Sermersuumili innarluutillit sullinneqarnerinut suliassaqarfimmi ingerlatsisup Susanne Kjærulf Christensenip inunnut innarluutilinnut illersuisup isornartorsiuinera ilisarisinnaannginnerarpaa.
Taannami isumaqanngilaq kommuni innuttaasunik innarluutilinnik sullissinermini aningaasanut tunngasunik tunngavilersuuteqartartoq.
- Aningaasaqarneq pissutigalugu itigartitsineq ajorpugut, taamaattoqarsimanera ilisarisinnaanngilara, Susanne Kjærulf Christensen oqarpoq.
Taanna Qeqqata Kommuniani ilaqutarinnermut ataatsimiititaliami siulittaasumit Hans Frederik Olsenimit ilalerneqarpoq.
- Aningaasaqarneq pissutigalugu itigartitsineq-ajorpugut, ataatsimiititaliap siulittaasua oqarpoq, sullissisullu aningaasaqarneq pissutigalugu itigartitsisinnaannginnerarpai, tunniuttakkat inatsisitigut aalajangersagaanerat pissutigalugu innuttaasunut tunniunneqartussaammata.
AAMMA ATUARUK Innarluutillit illersuisuata suliaqarnissaminut isumalluutit amerlanerit ujartorai
Sullissinermi tunaartaqartoqartoq
Aamma inunnut innarluutilinnut illersuisup kommunit akiniaasaartarnerannik oqarnera Susanne Kjærulf Christensenip Hans Frederik Olsenillu ilisarisinnaannginnerarpaat. Sermersuumimi sullissinermut arlalinnik tunaartarisassaqarpoq, ilaatigut innuttaasut akissutisinissamut qanoq sivisutigisumik utaqqisinneqarsinnaanerinut, tunaartarisassallu taakku malinneqartut, Susanne Kjærulf Christensenip oqaatigaa. Qeqqata Kommuniani ilaqutariinnermut ataatsimiititaliaq sulissisunut aningaasatigut annertuumik periarfissaqartitsivoq, taamaaliornikkut ataatsimiititaliaq akulerutsinngikkaluarlugu aalajangiinerit amerlanerusut pisinnaanngortillugit. Tamannalu sullissinermut oqilisaataasoq Hans Frederik Olsenip oqaatigaa, imalu assersuuteqarluni:
- Issiavimmik kaassuartakkamik 31.000 koruunilimmik qinnuteqaateqartoqarpat, sullissisullu 30.000 koruunit tungaannaanut aningaasaliisinnaatitaappata, taava ataatsimiititaliamut ingerlateqqaarneqartussaavoq. Aningaasanilli atuisinnaatitaanerat annertusivarput, taamaaliornikkullu qinnuteqaat suliarineqarluni allaffissornikkut akuerineqaannartussaalluni.
AAMMA ATUARUK Innarluutillit pillugit oqallinnermut kommunit peqataasariaqarput
Sulisulli ilinniartitaanerannut tunngatillugu ajornartorsiuteqarnera, Susanne Kjærulf Christensenip Hans Frederik Olsenillu takusinnaanerarpaat.
Qeqqata Kommunianimi innarluutilinnik sullissinerup iluani sullissisunik ilinniarsimasunik amigaateqarput, Sermersuumilu ilisimasat nutaat ulluinnarni sulinermi atornissaannut pikkorinnerulernissaq sulissutigineqarpoq.
