'Innarluutilinnut illersuisut isornartorsiuinera assortoruminaapput'

Kommunit innuttaasunut innarluutilinnut isumaginninnerat, innarluutillit illersuisuata pitsaannginnerarlugu isornartorsiorpaa. Tamannalu Qeqertalimmi borgmesterip Naalakkersuisullu tusaatissatut tiguaat.
Isumaginninnermut Naalakkersuisup Doris J. Jensenip kommunit innarluutilinnut isumaginninnermi ajornartorsiuteqarnerat nassuerutigaa.
Allattoq Mette Wallach
oktobarip 10-at 2018 16:02
Nutserisoq Connie Fontain

Kommune Qeqertalimmi borgmesterip, Ane Hansenip innarluutillit illersuisuata isornartorsiuinera miserratigisinnaanngilaa.

- Assortugassaanngitsorrujussuuvoq.

Qeqertalimmi borgmester oqarpoq, kommunillu sipaarniarnerannit innuttaasut tamarmik – aamma innarluutillit eqqugaasartut oqaatigalugu.

Ane Hansen naapertorlugu assersuutigalugu meeqqat innarluutillit pineqartillugit sulianik isumaginninneq ajornartorsiutitaqarsinnaasartoq.

Meeraq ukiukitsillugu isumaginninnikkut oqartussat angajoqqaallu qanimut suleqatigiilluartarput, meeqqalli atualerneratigut suleqatigiilluartoqarunnaartarpoq. suliamik isumaginninneq arriinnerulerlunilu naammassiuminaallisarpoq.

- Kisianni atualeraangata pissutsit allanngortarlutik, uffa meraq suli taanna pineqartoq. Taamaattumik tamakkua isigalugit pisariinnerusoq anguniarlugu massakkut suliaqarpugut.

AAMMA ATUARUK Innarluutillit illersuisuata isornartorsiuinera kommuninit isumaqatigineqanngilaq

Isornartorsiuineq aningaasanut inatsisissatut siunnersuummut ilaatinneqassaaq

Isumaginninnermut Naalakkersuisup, Doris J. Jensenip innarluutillit illersuisuata isornartorsiuinera aamma tusaaniarpaa.

- Paasisinnaalluarpara, inuit innarluutillit ilarpassui ullumikkut ajornasaarunneqartarnertik pissutigalugu naammagittaalliuteqartarmata, Doris J. Jensen oqarpoq. Taassuma  isornartorsiuineq innarluutilinnullu atugassarititaasut aningaasanut inatsisip 2019-imut isumaqatigiinniutigineqalernerani ilanngunneqarnissaat pingaartuusoq erseqqissaatigalugu.

Tamannalu ilutigalugu kommunit ilaanni ajornartorsiut annertungaarmata taakku ullormiit ullormut aaqqiivigineqarsinnaannginneri nassuerutigaa.

- Suliassat ilaat sivisunerusumik ingerlanneqartarput. Aamma kommunit ingerlatsilluarnissaat pingaarutilerujussuuvoq.  Tassanilu uagut kommunillu suleqatigiilluarnissarput pingaaruteqarpoq. Oqaloqatigiilluarnikkut paaseqatigiittarnissarput angusariaqarparput.

Inatsisartut 2019-imut inatsisissatut siunnersuut siusinnerpaamik novembarip 15-ianni akuersissutigissavaat.

AAMMA ATUARUK Innarluutillit pillugit oqallinnermut kommunit peqataasariaqarput

 

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk