Niisa Trawl: Inuttat angerlarnissaat pilersaarutaareerpoq
Niisa Trawlimik piginnittup, Svend Christensenip, KNR-imut sisamanngormat oqaatigaa kilisaammi Regina C-mi inuttat, arnap 20-nik ukiullip periarfeerunneqarnerata kingorna, Reykjavikkimiinnertik toqqissisimanartinnginnamikku sisamanngornermi unnukkut angerlartinneqassasut. Taamatulli nassuiaateqarnini maanna allanngortippaa.
Inuttalli sisamanngornermi unnukkut angerlarnissaat pilersaarutaareersimavoq. Piginnittulli KNR-imut oqaaseqarnermini tamanna nalusimavaa. Kukkunerlu Nisa Trawl A/S-imi paatsooqatigiinnermik pissuteqartoq oqaatigaa.
- Inuttat sisamanngornermi angerlassasut oqaatigaara, naak kilisaatip tallimanngornermi amuneqarneranut peqataasussaagaluarlutik. Allaffittali inuttallu akornanni tamanna isumaqatigiissutigineqarsimanera pissutigalugu kukkusumik paasissutissiinerivoq, taama oqaluttuarpoq.
Imaappa sisamanngornikkut unnukkut angerlarnissaat pilersaarutaareersoq nalusimagit?
- Inuttat kilisaammik ikaassinissaat, kilisaatillu 20-ani amutinnissaa pilersaarutaavoq, angerlaramali allaffiliarlungalu paasitinneqarpunga timmisartorlutik ullumikkut (sisamanngornermi, aaqq.) angerlassasut. Aamma Polar Nanup uiverutigineqarnerani angerlarnissaat ajoriffissaqartinngilarput.
Taamaammat suleqatiga oqaloqatigigakku sisamanngornermi unnukkut angerlarnissaat pilersaarutaareersimasoq naluat?
- Aap, kilisaatip amuneqarnerata aqaguani (tallimanngornermi, aaqq.) angerlarnissaat pilersaarutaagaluarpoq.
Svend Christensen sisamanngormat oqaluttuarpoq kilisaammi Polar Nanumi, ilaatigut Polar Seafoordimit pigineqartumi, inuttat kalaallit tigusarineqarnerisa kingorna, Regina C-mi inuttat ilaat Reykjavikkimi pisiniarfimmit aneqquneqarsimasut. Taamatullu pisoqarsimanera suli attappaa.
