Newport aningaasanik Nunatsinnit annissuisinnaavoq
- Aningaasaliiniartut nunanit allaneersut aningaasaliissapput, aningaasallu mittarfimmut atorneqassallutik. Taamaaliguni mittarfik tassaniilissaaq. Taannalu angerlaanneqarsinnaanngilaq, Søren Hovgaard oqarpoq.
Naalakkersuisullu nunanit allanit aningaasaliisussat pingaartikkaluarpaat.
- Kisianni tamatigut misissoqqissaagassaavoq, suna siunertaava, qanorlu innuttaasunut kinguneqassava? Kikkut naggaterpiaani akilertussaavaat? Uanili suliniummi Namminersorlutik Oqartussat qularnaveeqqusiinissamik pituttorneqassapput. Ajutoortoqaraluarpallu innuttaasut naggaterpiaani akilissavaat, attaveqarnermut naalakkersuisoq, Knud Kristiansen KNR-imut juulip 30-ani oqarpoq.
AAMMA ATUARUK Suliniut Newport Siumumit ilalerneqanngilaq
Aningaasaliisut aningaasarsiorusupput
Aningaasaliisussallu iluanaarutigisassatut 8-10 procentit missaanni piumasarisimagaat, taakkulu Namminersorlutik Oqartussat isumaat malillugit amerlavallaarujussuarneri pissutigalugu Naalakkersuisut akuersisinnaasimanngitsut Knud Kristiansen aamma oqarpoq.
Taannali ilumuunngitsoq, Søren Hovgaard oqarpoq.
Nexpartners aningaasaliisussallu suli isumaqatigiissuteqanngitsut, taamaammallu iluanaarutissat qanoq amerlatiginissaat suli oqaatigineqarsinnaanngitsoq, taanna nassuiaavoq. Aammali oqarpoq, aningaasaliisut soorunami aningaasarsiorusuttut, taakkuli iluanaarutissaat Naalakkersuisut isumaqatigiinniaqatigalugit aalajangerneqassasut.
- Suliniummut aningaasaliisussani piukkunartuni oqaloqatigisagut Kalaallit Nunaata karsianit tigooraaginnartoqarsinnaaneranik takorluugaqanngillat. Taanna pineqanngilaq. Pineqartoq tassaavoq, Namminersorlutik Oqartussat qanittumik suleqatigalugit siunissaq ungasinnerusoq eqqarsaatigalugu patajaatsumik aningaasarsiornissamik kissaateqarneq, Søren Hovgaard oqarpoq.
AAMMA ATUARUK Qaasuitsup kisimiiilluni suliniutaa nunatta sinneranut sunniuteqarsinnaasoq
AAMMA ATUARUK Newport pillugu nalunaarusiaq: Nalorninaateqarfiusinnaasut nalilersorneqartariaqarput
Aningaasaliisussalli nunanit allaninngaanneerpata iluanaarutigineqartut Nunatsinnit aninneqarpata, tamanna nunatta aningaasaqarneranut ajoqutaassasoq, isornartorsiuisut oqalupput.
Søren Hovgaardilli taamatut isornartorsiuisoqarnera paasiuminaatsippaa.
- Applemit qarasaasiamik pisigaanni, taava sinneqartoorutit USA-mut pisarput. Taava aamma aalisakkanik Kalaallit Nunaanni pisarineqartunik pisigaanni, taava aalisartut kalaallit aningaasarsissasut neriuppunga. Tamannalu pissusissamisoortuuvoq, Søren Hovgaard oqarpoq.
