Newport pillugu nalunaarusiaq: Nalorninaateqarfiusinnaasut nalilersorneqartariaqarput

Misissuinerup takutippaa suliniutip mittarfimmut aqqutilersuutinullu tunngasortai inuiaqatigiinnut 100 millionit koruunit missaannik akeqassasut.

Takornarialli tikittut amerleriaateqarnissaannut missiliuinerit ilanngukkaanni allatorluinnaq isikkoqarpoq:

"Inuiaqatigiit aningaasaqarnerannut sunniutissai tamarmiusut eqqarsaatigalugit (takornariaqarnerup sunniutissai ilanngullugit), aningaasaqarneq pitsaasuussaaq 3,4 milliardit koruuninik naleqassalluni. Tamannalu Newportip pilersaarusiutimini takornarianik amerlasoorpassuarnik toqqammaveqarneranik pissuteqarpoq", Cowip misissuinerani tamanna atuarneqarsinnaavoq.

AAMMA ATUARUK Suliniut Nunatsinnut aarlerinartoq

Taamaammat nalunaarusiami Namminersorlutik Oqartussanut kaammattuutigineqarpoq nalorninaateqarfiusinnaasut assigiinngitsut nalilersuiffigineqassasut. Nalorninaateqarfiusinnaasullu ilagaat takornariaqassutsimut tunngatillugu ilimagineqartut.

"Nunanit allanit takornariat amerlassussaannut naatsorsuutigineqartut ullumikkumut naleqqiullugit amerlasuupilussuupput. Taamaammat Suliniummi Newportimi takornariat taamatut amerleriaateqarnissaannut takornariartitsinikkut suliffeqarnikkullu naammassisaqarsinnaassuseqarnissaq pisariaqassaaq." issuaaneq naavoq.
 
Ilulissat 4.500-t missaannik innuttaasoqarpoq. Newportillu naatsorsuutigisai eqquutissappata, takornariat Ilulissani innuttaasut 25-riaataat ukiumut tikittassapput, Cowi taama allappoq.

Cowip misissuinera siorna novembarimi saqqummersinneqarpoq Peqqissutsimullu Attaveqarnermullu Naalakkersuisoqarfiusimasumit suliakkiissutaalluni.

AAMMA ATUARUK Lars-Emil Johansen mianersoqqusisoq

AAMMA ATUARUK Dorphip pilersaarusiarsuaq unitsittariaqarpaa